Ligasaun ho Serka Sanitaria no Konfinamentu Obrigatório fase dahuluk no daruak, loja konstrusaun sira iha kapital Dili, maioria la hetan autorizasaun hodi hala’o atividade venda. Maibé Segunda(5/4)semana ne’e, Governu liuhosi parte seguransa ho kareta la’o iha dalan Públiku, hodi husu ba loja konstrusaun iha Munisípiu Dili, bele hala’o hikas atividade ho normal.
Maske nune’e, nafatin husu mós ba loja na’in sira hotu, tenki kumpre nafatin regra prevensaun Covid – 19, hanesan uza maskara, distansia fizika, no fase liman hodi prevene aan husi Corona.
Udan bot hamosu estragus no ema lakon vida
Ligasaun ho udan bot iha sabádu kalan to’o domingu(4/04), Sidadaun lubuk ida tenke lakon vida. Balu mate tanba mota mak lori, balu seluk mate, tanba rai mak halai no monu, hodi taka sira.
Entretantu ho udan bot ne’e, hanesan ita hatene estraga mós komunidade lubuk nia uma liu -liu iha Dili laran inklui Munisipiu,tanba ne’e, komunidade afetadu, husu ba Governu, apoiu netik material konstrusaun, hodi konstrui fila– fali sira nia uma.
Atu hatan ba pedidu ne’e, Governu liuhosi Sekretáriu Estadu Protesaun Sivil, liuhodi media hateten, sei haree ba problema ne’ebé komunidade afetadu sira hasoru, ikus mai bele kanaliza apoiu sira ne’ebé mak presiza.***(TTM)
Discussion about this post