Parte Tekniku Servisu Mikro Biolojika Laboratóriu, Hospital Nasional Guido Valadares(HNGV), liuhodi media Nasional (Programa Dadeer Kmanek, GMN – TV) kuarta (14/07) ne’e esplika katak, Mekanizmu identifika ezistensia virus Corona – Delta iha Timor – Leste, dalan primeiru tenke liuhosi teste ne’ebé hala’o iha Melbourne – Australia.
Ninia prosedimentu mak equipa saúde akumula uluk rezultadu teste sira ne’ebé positivu ona no konsidera grave, hodi haruka ba Melbourne – Australia, husi ne’eba, mak bele klasifika dehan Corona – Delta ka la’ós, hodi haruka rezultadu mai Timor – Leste.
Ho esplikasaun ne’e, husu ba parte hotu, liu –liu ajente saúde ne’ebé hola parte iha servisu Jestaun Krize, hodi tau matan ba Timoroan ne’ebé mai husi liur, bainhira tama kuarentena, labele klasifika uluk sira, nu’udar pasiente Delta, ikus mai bele hamosu diskriminasaun ba sira.
“Sim ami seidauk simu informasaun dehan, iha karantina ne’eba mosu diskriminasaun. Maibé atu dehan katak, teste iha labotoriu mak bele identifika Corona – Delta ou la’e. Ita labele klasifika ema se de’it, nu’udar Corona – Delta.” esplikasaun husi matan saude nian.
Esplikasaun seluk, bazeia ba Siencia nian katak, 60 % virus Corona – Delta, fasil no lais tebes da’et ba ema seluk, hodi belit iha inus laran, kakorok talin, matan no ibun, hodi ataka ba parte vital hanesan pulmaun.
Tanba ne’e, dalan prevene tipu virus Corona saida de’it, servisu micro Biolojika HNGV, husu ba parte hotu espesialmente ba ema ne’ebé simu ona vacina kompletu (Doze ba daruak), atu nafatin tau maskra, distansia sosial, fase liman bebeik. Tanba vasina, só bele protese de’it, no la garante 100 %, livre husi virus. ***(Time)
Discussion about this post