Sidadaun Balu Latrata Dokumentu Sai Benefisiariu ba Fundu Veteranu  

Augosto A. Barreto, nu’udar sidadun ida ne’ebé, fó ona kontribuisaun ba prosesu luta ukun rasik aan Timor – Leste nian, liu husi Frente Armada (durante tinan 3) iha Sentru Norte no depois hala’o klandestina dezde tinan 1995 to’o 1999 dehan, sidadaun barak mak to’o oras ne’e, lakohi no latrata dokumentu, hodi sai mós, benefisiariu ba Fundu veteranu, tanba sira nia hanoin dehan, importante mak Timor – Leste, hetan   ona liverdade ka ukun rasik aan. 

 “Sidadaun barak mak kontribui ona ba prosesu luta ukun rasik aan, maibe labele sai benefisiariu ba fundu veteranu tan de’it lakohi trata dokumentu. Estadu mos tenke haree fali situasaun ida iha ne’ebe ema balu, uluk lakohi ukun aan, tanba rejistu ona hodi sai veteranu falsu, bele asesu fali ba fundu veteranu nian”, Augusto hato’o asuntu ne’e, ba Time Timor, liuhosi entrevista iha aldeia Haslaran, suku Camea, Cristo Rei, Dili,  kinta(03/03).

Tanba ne’e, nia husu ba Estadu, liu –liu Ministériu Asuntu Veteranu nian, presiza haree fali dadus veteranu nian ne’ebé rejistu ona, tanba ema rejistensia sira barak mak mate ona, no balu hahú katuas dadaun ona, ho kondisaun fizika ne’ebé iha problema ho saúde.

“Ema balu rejista ona tinan hirak liuba, hodi hein de’it prosesu verifikasaun maibé la’o neneik liu. Sidadaun balu nain mate ona. Hein ba hein, bainhira mak bele hetan sira nia direitu”, nia hato’o.

Hanesan benefisiariu mos ba fundu veteranu ho nivel 4 – 7 dehan, lamenta tebes ho ema balu ne’ebé nu’udar traidor Patria, maibé hetan kondekorasaun nivel alto ordem de Timor – Leste. Konaba ba ida ne’e, nia iha dokumenta balu mak komprova dehan, ema refere loloos la merese.

“Ema balu la’ós ona hela iha Timor, sai ona sidadaun husi Nasaun seluk, maibé tanba interese ema ida – rua nian, ikus mai Estadu entrega fali ordem Timor nian ho kategoria masima. Ida ne’e, presiza tebes hadi’a”. Nia husu hodi hakotu.

Fo hanoin fali katak, Estadu Timor – Leste, durante ne’e, konsege kondekora ona sidadaun Nasional lubuk ida, ne’ebé fó sira nia kontribuisaun ba iha prosesu livertasaun Pátria. Sira ne’ebé mate, iha funu laran no depois referendum 1999, familia sira mak reprezenta alende hetan serfikadu, hetan mós fundu(osan), bazeia ba tempu didikasaun ninian.

Husi parte seluk, Governu Timor – Leste, kondekora mós sidadaun Estranjeiru husi Nasaun Australia, Indonesia, Holanda, Inglatera, Portugal no seluk tan,  ne’ebé kontribui ona  ba iha prosesu auto determinasaun povu Maubere.  

Observasaun Time Timor iha kapital – Dili, iha loron veteranu ba tinan ida ne’e (3/32022), ladun iha atividade komemorativa sira hanesan tinan – tinan, tanba, veteranu sira mak envolve no tu’un direta, hodi partisipa iha kampanã Presidensial iha ne’ebé, ida – idak, hanesan equipa susesu ba kandidatu diferente, hahú husi númeru sorteiu 1 to’o númeru sorteiu 16. *** (TTM)