Graduasaun, Instituto Superior Cristal ba dala 17 – Mestradu ba dala 6

Reitor ISC – “Finalista 1237 Mak Hala’o Graduasaun iha Tinan Akademika 2025”

Asidente Mosu – Dalan Wain Ita La Respeita ba Sinais Tranzitu – Falta Atensaun (Klaru Dezastre ita La Hein)

Konsumu Mina – Masin Barak Hafasil Ema Lakon Moris – Mate

Magnifiku Reitor Instituto Superior Cristal – ISC, Prof. Dr. Sebastião Pereira rekonese, iha tinan Akademiku 2025, Finalista Rihun ida Atus Rua – Tolu Resin Hitu (1237) mak hala’o sira nia graduasaun, iha kampus Instituto Superior Cristal.

Tuir Reitor nia esplikasaun dehan, finalista hirak ne’e, priense ona kriteria kampus nian, no naran ne’ebé kampus submete ba Ministériu Ensinu Supeior Siensia no Kultura RDTL, konsege públika mós iha Jornal da Repúblika, nune’e hetan autorizasaun husi Governu, hodi bele realiza serimonia solene graduasaun ba tinan Akademiku 2025.

“Iha loron 29 fulan Desembru 2025, total finalista husi Kampus Instituto Superior Cristal, hamutuk Rihun ida- atus rua – tolu resin hitu – 1237 mak hala’o graduasaun, kompostu husi Fakuldade rua. Fakuldade Siensia Edukasaun no Fakuldade Siensia Saúde. Mane hamutuk Atus hat neen nulu resin ida – 461, feto Atus hitu – hitu nulu resin neen – 776,” informasaun ne’e, hato’o husi Magnifiku Reitor, liuhusi entrevista badak ho Revista Horizonte Cristal, iha nia Knar fatin Balide – Dili, loron 16 fulan Desembru tinan 2025.

Parte importante ida, Reitor rekonese tan katak, ba kursu Mestrado(Programa Mestradu ISC), ne’ebé estabelese iha Kampus Cristal iha tinan 2019, ba tinan Akademika 2025, realiza mós graduasaun ba dala neen iha ne’ebé, finalista Sia nulu resin rua – 92, mak hala’o graduasaun iha kursu nivel Mestradu nian.

Tuir dadus ne’ebé iha, finalista husi kursu Gestaun de Edukasaun – ISC, hamutuk Lima Nulu Resin tolu(53) no Kursu Teknologia Edukasaun – ISC, hamutuk Tolu nulu resin sia (39), kompostu husi feto, Tolu nulu resin ida – 31, Mane, Neen – nulu resin ida – 61.

Enkuantu parte seluk, haree kona – ba prosesu Ensinu nian iha Kampus Cristal ba tinan Akademiku 2025, Reitor esplika katak, prosesu ensinu iha kampus Cristal, la’o hanesan baibain. Alende ne’e, iha kooperasaun ho parte hotu, inklui Ministériu Ensinu Superior Siensia no Kultura RDTL, hamutuk ho parte sira hanesan Ajensia Nasional Avaliasaun Akreditasaun Akademika(ANAAA).

Entretantu haree kona – ba Rekursu fasilidade kampus nian, Rekursu humanu(Dosentes) iha kampus Cristal, hodi garante Prosesu ensinu ida iha kualidade hanesan públiku espekta, Reitor hato’o katak, iha Timor – Leste, oras ne’e daudaun kuaze iha Kampus hotu, hala’o investimentu hodi garante kualidade edukasaun nivel ensinu Superior, inklui mós Kampus Instituto Superior Cristal, tanba ne’e, Governu mós ápoiu ona kampus sira iha Timor – Leste, liuhusi Fundu Subvensaun Públika.

“Kona – ba investimentu hodi garante prosesu ensinu iha nivel ensinu Superior klaru ida ne’e, nu’udar prioridade ba kampus hotu. Ita nia progresu sobre fasilidade kampus Cristal, sempre hadia husi loron ba loron, tanba ne’e estudante mós aumenta bebeik kada tinan akdemiku, nune’e bele eduka Timoroan sira – Joven(Feto – Mane)nu’udar rekursu importante ba País doben Timor – Leste”

Parte ikus liu Reitor mós husu ba finalista sira hotu katak, ne’ebé konsege ramata ona kursu iha nivel lisensiatura, bele hakat fali ba pasu tuir mai, ba nivel Mestradu. Ba sira ne’ebé, termina ona kursu Mestradu, bele kontinua fali ba Programa Doutoradu. Edukasaun mak sai save, importante ba ita idak – idak nia moris, sa tan Nasaun ne’e, hola parte ona iha Membru ASEAN.

Prezidente Ezekutivu FC Hato’o Agradese ba MESSK – RDTL

Prezidente Ezekutivu Fundasaun Cristal Pro. Dr. Agostinho dos Santos Gonçalves “Intituto Superior Cristal – ISC, Kontinua hadia Aan, haree ba kualidade Ensinu”

Prezidente Ezekutivu Fundasaun Cristal (FC), Prof. Dr. Agostinho dos Santos Gonçalves, agradese ba Ministériu Ensinu Superior Siensia no Kultura(MESSK) RDTL, tanba durante ne’e, iha kooperasaun servisu hamutuk neébé di’ak Tebes, hodi haree kona – ba progresu dezenvovimentu kampus sira hotu, iha Timor – Leste, liu – liu kampus Cristal, ne’ebé nu’udar parseiru Governu nian, hodi produs rekursu umanu kontribui ba dezenvolvimentu nasional.

“Liuhusi Graduasaun Instituto Superior Cristal nian ba dala sanulu resin hitu – 17 iha tinan 2025, lori Kampus Cristal nia naran, agradese ba Governu, espesialmente Ministériu Ensinu Superior Siensia no Kultura(MESSK) – RDTL, no Ajensia Nasional Avaliasaun Akreditasaun Akademika – ANAAA, ne’ebé, durante ne’e servisu maka’as tebes hamutuk ho Universidade sira hotu, iha Timor – Leste espesialmente Instituto Superior Cristal, nune’e lori rezultadu di’ak. Ba ami iha tinan akademiku 2025, konsege gradua tan finalista Rihun ida atus rua – tolu nulu resin hitu(1237), husi Fakuldade rua, Siensia Edukasaun no Siensia Saúde,” gratidaun ne’e, hato’o husi Prezidente Ezukutivu FC, liuhusi entrevista badak ho Revista Horizonte Cristal iha nia knar fatin Balide – Dili, loron 16 fulan Desembru 2025.

Tanba ne’e, nu’udar parseiru Governu nian tuir Prezidente Ezekutivu Fundasaun Cristal nia esplikasaun ida katak, kampus Cristal kontinua buka hadia aan, liu –liu haree ba fasilidade Kampus no fasilidade Rekuru Umanu, hodi haree ba kualidade, nune’e bele tulun Nasaun liuhusi Produsaun Rekursu ikus mai bele kompete iha merkadu Nasional, Rejional no nivel internasional.

“Prioridade ba kampus Cristal, Fundasaun sempre tau matan ba kapasitasaun dosente hodi priense kriteria, nune’e haruka dosente lubuk ida ba hala’o estudu iha Nasaun CPLP, Indonesia, Malasia no seluk tan hodi orienta kualidade edukasaun ida ne’e, ba kampus maske neneik maybe bebeik”.

Prezidente Ezekutivu mós esplika katak, durante ne’e regra sira ne’ebé hatu’un ona husi Ministériu Ensinu Superior Siensia no Kultura(MESSK) RDTL, kona – ba prosesu ensinu nian, iha Nivel Ensinu Superior, ba kampus Cristal sempre kumpri, la’o tuir, hodi bele prienxe Kriteria ne’ebé mak iha.

“Ezemplu ida mak lista finalista sira nian, antes sira ba hala’o graduasaun, tenki submete uluk ba Ministériu hodi verifika dokumentu sira, hanesan kriteria ida importante tebes. Kriteria hotu, kampus tenki kompleta, hafoin lista finalista nian bele aprova, hodi públika iha jornal da Repúblika, ikus mai finalista sira bele tuir serimonia solene graduasaun ninian”

Tuir Prezidente Ezekutivu katak, durante ne’e, kooperasaun kampus nia di’ak tebes liga ba servisu Ministeriu Ensinu Superior Siensia no Kultura RDTL, tanba ne’e iha vizita, avaliasaun kampus Cristal liuhusi Reitor, Dosente sira iha Fakuldade no Departementu sira sempre koopera ho di’ak.

Mensajen ba Graduadus ISC ba Tinan Akademiku 2025

Parabens ba imi hotu, ne’ebé gradua ona iha Kampus Instituto Superior Cristal. Uza ba Matenek ne’ebé iha, bainhira fila ba sosiedade nia let. Obrigadu ba Inan – aman, ka familia sira ne’ebé, durante fo fiar no haruka oan sira, buka aprende Siensia – matenek iha Kampus Cristal – ISC.

“Ha’u Hato’o Parabens no Dezeiju Susesu ba imi ida – idak. Obrigadu ba Inan – aman nia Suporta tomak durante ne’e. Feliz Natal 2025, no Feliz Tinan Foun 2026 ba imi hotu. Jesus Lori Dame, Paz mai ita ida – idak. Hado’k Aan, husi problema oin – oin. Se iha problema ruma, buka tu’ur hamutuk hodi resolve didi’ak la’ós uza Violensia”. Lian Murak, hanesan Mensajen husi Prezidente Ezekutivu Fundasaun Cristal Prof. Dr. Agostinho dos Santos Gonçalves, espesialmente ba graduadu sira tinan akademiku 2025.*****(Time Timor)