Ilidio Mautersa Mendonça, iha tempu rejistensia hahú husi tinan 1991 to’o 1999, iha Igreja, São Pedro – São Paulo, Aileu hala’o knar hanesan ativista ida ho funsaun troka informasaun husi vila laran ba ai – laran, ligasaun ho prosesu luta ba livertasaun nasional. Sidadaun ne’e, hola parte mós iha Klandestina, liuhosi kaixa HAOK (Halibur Aswain Oan Ki’ak). Tanba envolve iha Frente klandestina tama ba iha fulan Maiu tinan 1999, depois akordu 5 de Maiu 1999, Ilido hetan kaptura husi organizasaun AHI.
Refleta ba selebrasaun loron Falintil ba dala – 47, (20 Agostu 1975 – 20 Agostu 2022), husu ba Timoroan hotu, halo netik reflesaun ida, tanba papel Falintil nian, liuhosi didikasaun durante tinan rua nulu resin hat 24, (1975- 1999), importante tebes ba iha prosesu luta ba Pátria.
“Dala ruma ita lasente katak, Nasaun ne’e, antes hari’i mai husi se – se nia esforsu. 20 de Agostu, nu’udar loron Forsa Armada Livertasaun Nasional Timor – Leste(Falintil). Iha loron ne’e, Timoroan hotu presiza halo netik reflesaun badak konaba papel no knar Falintil nian, ne’eb’e halo ona ba rai ida ne’e, ikus mai Timor – Leste, sai ona Nasaun soberana ida,” kestaun ne’e, hato’o husi Ilidio, ba Time Timor liuhosi entrevista badak iha nia knar fatin, Faulara, Bebonuk – Dom Aleixo – Dili, sesta(19/08).
Aileu oan ne’e, konta istoria balu dehan durante invazaun 7 Desembru 1975, nia ho familia lubun ida, husi lisan Malimeta(Hoholau), kompostu ema 60 resin, halai sai ba ailaran hamutuk ho forsa Falintil, hasoru situasaun ida difisil ikus mai ema balu moras, hamlaha, maioria mak lakon vida(mate).
Ho triste Ilidio dehan “Ami sorte di’ak mak fila. Familia barak mak mate hela iha ai – laran tanba moras no hamlaha. Sira nia terus hamutuk ho forsa Falintil, tanba de’it hakarak Timor – Leste, alkansa mehi bot ida, Ukun rasik aan. Didikasaun, terus, susar, matawen, ne’ebé Falintil no povu halo ona ba rai ida ne’e, presiza hetan apresiasaun”. Nia husu.
Ilidio M. Mendonça, ne’ebé ho naran kodigu “Mauth” husu ba Nasaun, atu valoriza Timoroan sira hotu ne’ebé, fó ona nia kontribuisaun iha fase difisil.
Tan ne’e, Mauth hato’o sujestaun ida dehan, “Loloos ne’e, atu identifika se mak iha direitu hetan rekoñesimentu husi Estadu ba nia kontribuisaun durante funu, dirijente kaixa nian, hahú kedas iha base, tenke hatene nune’e, se – se mak membru nune’e, fasil identifika,” nia hato’o.
Antes termina dada lia ho Time Timor, tatoli lia ba Governu Timor – Leste husu katak iha era liverdade parte importante ida presiza kria empregu ba joventude sira, no tenke produs politika ida di’ak hodi dada investidores, mai investe iha rai laran, ho objetivu hamenus Timoroan sira, kada loron sai ba rai liur buka servisu.
“Sim ita konkorda Timoroan sira ba servisu iha rai liur, tanba hatama osan mai rai laran, maibé Governu mós tenke halo politika di’ak, hamosu tan, empregu iha rai laran ba iha kualker area. Alende ne’e, lider sira tenke iha amizade, unidade, tenke halakon injustisa social, atu ema hotu bele sente moris hanesan iha País ida ne’e, laiha riku no laiha ki’ak.” Mauth hato’o hodi hakotu.
Entretantu refleta ba sidadaun nasional sira ne’ebé fó ona kontribuisaun iha tempu funu, lider Frente Armada nian lubuk ne’ebé sei moris, hanesan Falur Rate Laek, Lere Anan Timur, no seluk tan liuhosi Media nasional dehan ona katak, “Nasaun sei buka no valoriza hotu ba nia sidadaun nasional no internasional sira ne’ebé, fó ona kontribuisaun iha tempu difisil, maske nia fó de’it be’e kopu ida, Estadu sei sura no sei lahaluha.**** (TTM)
Discussion about this post