Presidente Ezekutivu Fundasaun Cristal, Agostinho dos Santos Gonçalves, hateten loron 31 fulan Janeiru kada tinan, hanesan loron ba selebrasaun Festa Don Bosco iha Mundu tomak, inklui iha Timor – Leste.
Nia dehan tan, tanba Instituto Superior Cristal (ISC), hari’I husi Antigus Alunus Salesiano Don Bosco, kompostu husi fundador na’in salunu, nune’e, hili loron Don Bosco nian, hodi fó graduasaun ba finalista Cristal hamutuk atus hat ualu nulu resin sia(489).
“31 Janeiru festa espesial ba Don Bosco. Tanba ne’e, ba tinan akademiku 2021, alende komemora loron Don Bosco nian, ISC hala’o mós nia graduasaun ba dala sanulu resin tolu,” hato’o husi Presidente Ezekutivu liuhosi nia palestra iha okaziaun serimonia graduasaun ne’ebe hala’o iha CCD – Dili, segunda(31/01).
Fatin hanesan Reitor ISC, Dr. Sebastião Pereira, MM, rekonese katak, estudante Finalista ne’ebe simu graduasaun, mai husi Fakuldade rua. Fakuldade Siensia Edukasaun no Fakuldade Siensia Saúde.
“ Sira ne’ebé ohin simu graduasaun, hasai kursu iha nivel Bacharelatu, Lisensiatura no mós kursu nivel Mestradu nian iha parte Jestaun Edukasaun no mós jestaun Teknologia,” hato’o husi Reitor.
Maske nune’e , Reitor fó nafatin korazen no kontinua husu ba graduadu ISC tomak, espesialmente ba tinan akademiku 2021 katak, hahú aban ba oin, se bele, aumenta tan nivel estudu signifika, husi nivel bacharelatu tenke ba fali lisensiatura, husi lisensiatura ba fali Mestradu, no mestradu kontinua ba nivel doutoramentu ninian,
“Graduasaun ida ne’e, ba imi hanesan inisiu husi prosesu aprendizajen. Tanba ne’e, hahú aban ba oin, imi ne’ebé bacharelatu ona, buka ba sai to’o ba lisensiatura, mestradu , hodi bele aumenta nivel akademiku kontribui ba kualidade rekursu umanu iha Timor – Leste,” nia hato’o..
Antes termina nia deskursu, hato’o agradesimentu ba parte hotu, liu – liu Ministériu Ensinu Superior Siencia no Kultura, tanba durante ne’e, servisu hamutuk ho Ensinu Superior Privadu sira hotu, liuhosi produsaun politika ida di’ak, liuhosi servisu avaliasaun ANAAA, ne’ebe ho orientasaun ba hadi’a kualidade, inklui fó hanoin ba ensinu superior sira hotu, oinsa bele prepara aan di’ak liu tan ligasaun ho programa estudus, fasilidades kampus nian, nune’e, produs rekursu umanu ne’ebé iha kompetensia hodi bele kompete iha merkadu traballu.
Hafoin rona tiha deskursu husi Reitor ISC, Ministru Ensinu Superior Siensia no Kultura, Longinhos dos Santos, hato’o nia apresiasaun profunda ba esforsu hotu ne’ebé mak durante ne’e, ISC – halo, maske hasoru dezafiu sira, maibé sai duni parseiru di’ak ba Governu, hodi produs rekursu umanu iha area edukasaun, hodi bele kontribui ba iha prosesu dezenvolvimentu Nasaun nian, iha aspeitu Edukasaun.
Okaziaun hanesan Ministru mós promete ona, sei apoiu di’ak liu tan universidade privadu sira hotu, oinsa mak bele hasa’e kualidade dosente sira nian, liuhosi atribui saun bolsa estudu, ba dosente sira.
“Governu kontinua buka maneira oin – oin, oinsa mak tulun universidade privadu sira iha rai laran. Durante ne’e, apoiu ona dosente sira ba Nasaun CPLP, hamutuk 56, no iha tinan 2023, sei aumenta liu tan numeru husi dosente sira nian”. Nia hato’o hodi termina.
Entretantu representante graduadu ne’ebé reprezenta husi Bonifacio Cardoso Martins, lori graduadu hotu nia naran, hato’o agradesimentu ba dosente sira iha Instituto Superior Cristal, tanba sira nia didikasaun, esforsu, pasensia, ikus mai estudante ISC tinan akademiku 2021, konsege simu ona sira nia gradusaun iha loron 31 fulan Janeiru 2022.
Nia parte mós hato’o, muda fita husi karuk ba loos, hanesan aprende teoria hotu ona iha fase dahuluk nian, agora ba fali fase tuir mai, hodi hala’o pratika ninian. “Muda fita iha Sapeo signifika muda teoria ba pratika”. Bonifacio hato’o hodi termina.
Observasaun Time Timor relasiona ho graduasaun ne’e, marka prezensa husi membru antigus alunus Salesiano Don Bosco, Representante husi Universidade no Instituto Superior Privadu iha rai laran, Marka mós prezensa husi Vice Ministru Edukasaun no Desportu Antonio Guterres, entidade membru Parlamentu Nasional Duarte Nunes, no bainaka importante sira seluk. ***** (Time Timor)
Discussion about this post