Reativa Aula Prezensial IEC Sei Implementa Regra Rigor

Instituisaun Edukativa Crista(IEC),sei realiza aula prezensial iha segunda(27/09) semana oin. Tanba  ne’e, Presidente Ezekutivu Fundasaun Cristal Agostinho dos santos Gonçalve hataten, sei implementa regra prevensaun Covid – 19, ho rigor.

Asuntu ne’e, fo sai ba dosente – alunu Cristal, diretor no professor sira husi eskola ensinu básiku to’o  ensinu sekundariu, liuhosi   enkontru preparativu reativa aula,  ne’ebé hala’o iha  edifisiu eskola sekundariu Cristal – Balide, kinta(22/09).

Presidente Ezekutivu esplika, Cristal hetan autorizasaun husi Edukasaun Munisipíu Dili, hodi reativa aula prezensial, tanba  prienze ona rekezitu konaba prevensaun Covid – 19 tuir padraun Saúde no Organizasaun Mundial Saúde.

Tanba ne’e, nia dehan, estudante, professor ou dosente ne’ebé seidauk vasina, sei la autoriza hodi tama iha resintu eskola.  

“Semana oin, ita reativa ona aula prezensial. Maibé se mak atinzi  ona tinan 18, ba leten tenke vasina. Karik la vacina, estudante, professor ka dosente sira laiha kartaun kinur, di’ak liu hela iha uma. Eskola  sei la autoriza ema ne’ebé, seidauk vacina tama ba iha resintu eskola ho kestaun saúde públiku.” Presidente Ezekutivu klarifika.

Fatin hanesan Reitor Sebastião Pereira, iha nia intervensaun hato’o, bainhira reativa ona aula prezensial, kestaun limpesa importante ba parte hotu.

“Ita bele uza maskara  no fase liman bebeik, maibe laiha limpesa virus kontinua iha.  Kuandu  reativa ona aula prezensial, asuntu limpesa parte hotu tenke konsidera hodi implementa,  liu –liu antes hahú aula minitu 15, tenke limpeza, hahú kedas iha fatin ka ofisiu dosente, sala profesor, inklui sala alunus nian” nia husu.

Tuir informasaun ne’ebé Time Timor asesu, daudaun ne’e, númeru vasina iha Cristal hatudu progresu  hanesan tuir mai:

1. Númeru vacina husi edukador iha nivel ensinu básiku 98 %.
2. Númeru vacina husi edukador iha nivel ensinu básiku 3^o ciclo, atinji ona 95 %,  restu seluk  seidauk, tanba balun isin rua.
3.  Ba nivel ensinu Sekundáriu professor ne’ebé vacina ona atinji 97 %. Alende ne’e, estudante sekundariu ba nivel finalista lubuk ida mós hetan ona vacina, liu –liu hahú husi tinan 18 to’o tinan 20.
4. Númeru vacina husi dosente Instituto Superior Cristal atinzi ona 98 % porsentu, tanba balu seidauk kompleta segunda doze.
5. Númeru vacina dosente husi pos graduasaun ISc nian, atinzi ona 100 %.

Maske nune’e, tuir planu ne’ebé  iha, eskola sei kria equipa konjunta ida kompostu alunus, professor, dosente, hodi kontrola no halo prevensaun rutina, liu –liu haree ba  regra uza maskra, tenke tu’ir iha distansiamentu fisiku, limpeza, inklui aranza fasilidade be’e no sabaun ho ativu, hodi fó protesaun no hamenus transmisaun Covid – 19, iha resintu eskola.*****(Time)