Jacinto de Oliveira Junior, nu’udar vice Reitor Instituto Superior Cristal (ISC), apresia ba inisiativa husi estudante Fakuldade Edukasaun semestre II, tanba bele realiza semináriu ba loron ida ho tema jeral “Oinsa Dezempeña Eleva Kapasidade, Pepel Joventude ba iha Prosesu Dezenvolvimentu Nasional”.
Nia dehan, durante ne’e, atividade hotu, iha Kampus Cristal, só organiza husi chefe departamentu sira, ka parte Instituto nian.
“Hato’o apresiasaun ba imi – estudante hotu, husi departamentu sanulu. Foin ba dahuluk estudante Fakuldade ida ne’e, iha inisiativa rasik hodi organiza malu realiza semináriu ho orador na’i rua, no orador prinsipal ida mak presidente ezekutivu Fundasaun Cristal Dr. Agostinho dos Santos Gonçalves”, dehan vice reitor liuhosi nia palestra antes abertura semináriu, ne’ebé hala’o iha kampus Cristal – Balide, sesta(15/10).
Hanesan motivasaun ida ba estudante semestre II Fakuldade Edukasaun nian, vice reitor empresta hela hanoin ida husi primeiru Presidente Indoneisa nian Soekarno, ho lia fuan hatete, joventude hahú tinan 21, tenke iha ona hanoin, mehi, oinsa liverta aan, no bele fó kontribuisaun ba dezenvolvimentu nasional, liuhusi papel hanesan joventude.
Reitor ISC, Dr. Sebastião Pereira hatete, – Papel mak responsabilidade pesoal, grupu, liuhosi hala’o atividade sira relasiona ho dezenvolvimentu ne’e rasik. Enkuantu dezenvolvimentu mak hanesan mudansa, husi laiha ba iha, husi ladi’ak sai di’ak liu tan.
Iha fatin hanesan José Maria da Silva, representa estudante Fakuldade Edukasaun – ISC, ba Jornalista sira hato’o katak, seminariu ne’e hamutuk ho orador sira, hodi esplika dezenvolvimentu nasional ligadu ho papel estudante nian haree husi abilidade, ikus mai bele aposta ba dezenvolvimentu nasiona iha futuru.
Iha semináriu ne’e, Dr. Agostinho dos Santos Gonçalves, lori tópiku “Papel Joventude ba Iha prosesu Dezenvolvimentu Nasional” no orador Segundo hamutuk ho dosente Natalino de J. P. Parada, ho tópiku “ Prespektiva Kualidade Edukasaun iha Timor – Leste”.*****(Time)
Discussion about this post