Observador politika husi Universidade Nasional Timor Loro Sa’e, parte Fakuldade Siencia Sosial e Politika, Camilio Ximenes dehan, atu labele kria konfuzaun no komplika situasaun politika iha rai laran sai komplika liu tan, kandidatu Presidente Repúblika ne’ebé hetan fiar husi povu, iha eleisaun agora(19/03), iha loron 20 fulan Maiu 2022, se de’it bele fó pose, tanba hanoin dehan sei dezolve Parlamentu nasional, ida ne’e, sei hamosu konfuzaun no interpretasaun oin – oin.
“Importante mak ba kandidatu ida, oinsa mak nia bele eleitu. Agora se mak atu fó pose, ba ha’u nia hareee atu Presidente Parlamentu Aniceto Guterres, mak fó pose, laiha problema, tanba legal ka illegal situasaun akontese ona,” Camilio hato’o asuntu ne’e, ba Time Timor, liuhosi entrevista, iha nia servisu fatin Caicoli – Dili, iha semana ikus fulan Janeiru 2022.
Nia dehan tan katak, dala ruma ema hamosu duvidas ba Presidente Parlamentu Aniceto Guterres dehan ne’e ‘llegal, maibé nia mós lasala. Atu sala ou la’e, ne’e só tribunal Rekursu mak bele konsidera.
“Loos hela mak parte Tribunal Rekursu mós la kestiona. Agora iha públiku nia hanoin dehan viola no hada’u poder, ok, maibé buat hotu liu ona,” nia hato’o.
Enkuantu hatan pergunta balu husi publiku ne’ebé dehan, posibilidade Arão Noe de Jesus mak sei fo pose ba Presidente foun tamba dehan, iha legalidade, Camilio esplika katak, – Konaba dezolve Parlamentu bele akontese, depende ba situasaun. Maibé dehan fali Arão Noe mak sei fo pose ba Presidente foun, ba ha’u laiha esplikasaun, tamba Parlamentu rasik iha nia rejimentu proprio signifika katak, se mak aujensia ka la hala’o knar, atu garante funsionamentu normal hanesan baibain ida seluk, avansa fali kedas”, nia hato’o.
Antes termina dada lia ho Jornalista Time Timor, dosente ne’e iha esperansa ida katak, atu situasaun rai laran la’o ho di’ak no labele haterus bebeik povu, maka Timoroan hotu tenke fó liman ba malu, liu –liu presiza mai ho hanoin sira ne’ebé positivu.
“Ba ha’u situasaun sira ne’e, atu la’o di’ak maka Timoroan sira hotu, liu –liu ema politiku sira tenke iha hanoin positivu, Unidade, no paz. Hanoin ne’ebé diferente, hodi kompleta malu para buka solusaun ba problema sira ne’ebé Nasaun no povu hasoru ezemplu falta be’e mo’os no seluk tan”. Nia hato’o hodi hakotu. *** (Time Timor)
Discussion about this post