Rafael Savio “Profesor Kontratadu Kontinua Hala’o Knar”

Diretor Eskola Ensinu Sekundariu  Privada Cristal, Dr. Rafael Savio MM, dehan profesor/a  ne’ebé Governu kontrata hodi hanorin iha eskola Cristal durante ne’e, kontinua hala’o sira nia knar tanba hetan fali kontratu husi Fundasaun Cristal.

“Ita iha duni profesor balun ne’ebé Governu mak selu durante ne’e. Maibé  relasiona hapara ona  kontratu ho sira nune’e, Fundasaun Cristal foti inisiativa kontrata fali sira ida – idak hodi kontinua hanorin ida ne’e laiha ona determinasaun tempu to’o sira mak hakarak sai de’it,” kestaun ne’e, hato’o husi diretor ba media ne’e liuhusi entrevista badak iha eskola Cristal Balide – Dili, segunda(22/01).

Enkuantu tuir dadus ne’ebé  hato’o husi Diretor Rafael katak, total manorin na’in ne’ebé Governu kontrata durante ne’e, kuaze tolu nulu resin tolu(33). Sira ne’e hotu balu hanorin iha eskola Cristal Dili, Suai, no Manufahi, liu –liu iha eskola nivel sekundariu ninian.

Diretor eskola Cristal

“Hafoin sira asina kontratu husi Fundasaun nian, atividade ensinu la’o  normal mesmu iha eskola Cristal Dili, Suai, Maliana, Viqueque, Manufahi no Aileu. Tanba ne’e  tinan letivu 2024 komesa hahú ona bazeia ba kalendariu eskolar husi Ministériu Edukasaun.” Hato’o hodi hakotu.

Fatin hanesan adjuntu Diretor Bernardo de Araújo,  hato’o nia sentimentu  triste relasiona ho iha eskola balu kuaze taka total tanba laiha profesor hodi hanorin.

“Kestaun mak ne’e, estudante mak sai vitima.  Nu’udar profesor atu para ou la’e ida ne’e, la’ós problema. Maibé  ita nia oan sira mak sai vitima husi prosesu hapara ba profesor kontratadu sira ne’ebé Governu selu.” Hato’o husi adjuntu hanesan preokupasaun ida ba Governu. 

Tanba ne’e Profesor Bernardo kontinua husu parte Edukasaun, se bele haree fali ba problema ne’e, tanba estudante sira mak hanesan futuru ba Nasaun.

“Parese Governu nian politika hakarak hadi’a kestaun balu maibé se hakarak hapara, entaun hapara hotu. Labele hapara balu balun laiha ida ne’e mak kestaun. Se nia kursu seluk mak hanorin sim bele hasai nian maibé nia formasaun ba hanorin hanesan espesialidade ida ne’e nia tenke kontinua, nune’e labele prezudika fali esudante sira.” Hato’o hodi hakotu.

Hakarak fó hanoin fali katak, relasiona ho hapara kontratu ba profesor balu iha ona ezijensia  lubuk ida hato’o ona ba Governu hodi buka solusaun ne’ebé justu.****(TTM)