Reflesaun Loron 12 Novembru Importante ba Timoroan  

• Tanba Sa Tragedia 12 Novembru – Dili Tenki akontese

Masakre Santa Cruz – Dili, mosu iha loron 12 fulan Novembru tinan 1991. Masakre ne’e, hamosu vitima , feto – mane, ne’ebé maiora nuudar estudante. Ema  barak lakon, hetan turturasaun, hasoru intimidasaun no tama kadeia hodi hetan sofrimentu sira tanba de’it kauza ukun rasik aan.

Hanesan ita hatene  tinan ne’e,  Timor –  Leste, komemora ona loron joventude Loriku As wain ne’e, ba dala tolu nulu resin rua(32), 12/11/1991- 12/11/2023.

Publisidade Silvia printing Dili

Ilidio M, Mendonça, hanesan sidadaun ida altura ne’eba hola parte mós iha Frente Klandestina dehan, ho trajedia loron 12 de Novembru 1991, halo mundu tomak loke  matan ba kauza prinsipal Timor – Leste nian.

“Ita presiza halo reflesaun klean ba trajedia santa cruz – Dili, tanba loron ne’e, importante ba Mundu tomak hodi rekonese Timoroan sira nia hakarak loloos mak “liverdade no ukun rasik aan,” esplika husi Ilidio ba media ne’e, liuhusi entrevista iha Dili loron 11 fulan Novembru 2023.

Tanba ne’e, nia husu ba Joventude  iha era liverdade nian tenke banati hahalok, lala’ok no ispiritu husi Joventude loriku As wain sira  ne’ebé hatudu ona liuhusi  trajedia Santa Cruz.

“Tanba sa trajedia santa Cruz tenke mosu?, ida ne’e hatudu katak, Joventude Loriku As wain hadomi nia rain husi okupasaun estranjeira nian, nune’e barak fó aan ba mate, hodi hetan paz no liverdade hanesan Nasaun Independente ida.  Liverdade iha ona Joventude hotu tenke hakribi’i hahalok violensia, buka kria paz, moris iha domin- dame, nune’e bele goja ukun rasik aan  ida ne’e, ho kontente siginifika ema hotu la sente tauk, la’o no moris livre iha nia rai rasik,” nia hato’o hanesan  esperensa.

Ilidio M. Mendonca

Ikus liu tatoli lia ba Timoroan hotu liu –liu Joventude nu’udar ai – rin ba RDTL, tenke buka aproveita tempu, hodi luta ba moris di’ak ba aan rasik, familia no Nasaun.

“Tempu ne’e badak tebes. La’os ona oras  Joventude sira kria konfuzaun. Era liverdade tenke aproveita tempu ho didiak, buka estuda, kompete maibe importante mós hatene respeita, hatene lala’ok etika moral nian, hodi hamosu ambiente harmonia iha sociedade nia let”. Hato’o hodi hakotu.****(TTM)