Partidu Frente Mudança (FM), liuhosi dirijente Ricardo Neu, hateten iha periodu mai, bainhira povu kontinua fó konfiansa, mehi partidu nian sei tau forsa bot, hamutuk ho povu, luta ba ekonomia nasional tanba hakarak lori povu ba moris di’ak.
“Frente Mudança , hakarak mak mudansa. Mudansa ba povu nia moris iha kualker area hanesan ekonomia, Justisa, no seluk tan. Preoridade ami nian iha tinan lima mai, sei tau atensaun ba setor edukasaun no halo mudansa ba karater ema Timoroan nian, liu – liu servisu maka’as,” esplika husi Ricarcdo ba Time Timor liuhosi entrevista iha Pantai Kelapa foin lalais.
Ricardo subliña, Partidu Frente Mudança mós, konkorda tebes ho Timoroan sira ba Servisu iha rai liur, tanba ida ne’e, hanesan prosesu inisiu, husi aprende nian, nune’e loron ida, bele mai dezenvolve fali Timor – Leste.
“La’os dehan ita fó apoiu 100 %, hodi trabalador Timoroan ba servisu iha liur, maibé ida ne’e hanesan prosesu aprende husi Nasaun seluk. Japaun, China no Korea rasik, sira uluk aprende barak husi Nasaun liur, sa tan ita Timoroan sira, ida ne’e normal no presiza duni,” nia hato’o.
Nia rekoñese, ho Covid, iha tinan rua liu ba, ida ne’e afeta Nasaun barak. Tanba ne’e, se joven Timoroan hakarak ba servisu hadi’a moris, ita labele impede maibé buka atu suporta. Alende ne’e, joventude sira tenke iha hanoin positivu, karik iha ema nia rain, tenke hatudu disiplina, labele hatudu jagoan, oho malu, tanba ida ne’e, sei lakontribui ba moris diak, maibé afeta ba Nasaun nian moris.
“Sorte liutan joventude sira hakarak servisu. Ida ne’e progresu. Perigu mak joven sira lakohi servisu(sai baruk ten, mauhais,) ne’e Nasaun la ba oin. Sira servisu iha liur inderetamente kontribui ba Timor – Leste, hanesan haruka osan halo uma iha Timor no seluk tan.” Nia esplika.
Antes hakotu dada lia ho Time Timor, esplika katak, Ekonomia bot liu iha Mundu ida mak iha Rejiaun pasifiku nian, hanesan China, Japaun, Singapura, inklui mós America no Australia. Tanba ne’e, Timor – Leste fasil tebes atu sai Nasaun ne’ebé moris di’ak, bainhira ema hotu iha vontade luta ba Ekonomia nasional iha kualker area, liu –liu area preoridade sira ne’ebé seidauk esplora ho didi’ak. **** (TTM)
Discussion about this post