Embaixador Indonesia ba Timor – Leste, Okto Dovinus Manik, hateten hafoin Nasaun rua, RI – TL, konsege define kestaun fronteira Rai maran ho di’ak, fase tuir mai, sei ko’alia mós konaba fronteira maritima .
“Konaba kestaun fronteira rai maran, daudaun ne’e Indonesia no Timor – Leste, konsulta ona ba malu no prosesu kontinua espera tempu besik bele konklui ona, husi parte teknika ninian. Ita nia preoridade tuir mai, sei define mós baliza iha parte tasi/maritima,” kestaun ne’e, hato’o husi embaixador ba Jornalista sira, liuhosi entrevista, hafoin serimonia icar Bandeira Nasional, ne’ebé hala’o husi sidadaun Indonesia sira iha Dili, hodi komemora loron proklamasaun Repúblika Indonesia nian ba dala 77, kuarta(17/08).
Husi parte seluk, Tuir Okto Manik nia esteitmentu ida dehan, ho restaurasaun Repúblik Indonesia nian ba dala 77, Republika Indonesia selebra ona kooperasaun diplomatika ho Timor – Leste, kompleta ona ba tinan 20.
“Ofisialmente Nasaun rua, estabelese relasaun bilateral iha loron 22 fulan Jullu 2002. Tinan ida ne’e, alende Indonesia proklama nia independensia, kooperasaun bilateral entre Nasaun rua, dura ona ba tinan rua – nulu,” hato’o husi embaixador.
Embaixador ne’e, iha esperansa ida katak, parte rua kontinua servisu hamutuk ho objetivu prinsipal bele lori povu husi Nasaun rua, alende bele iha amizade, orienta mós ba parte moris di’ak.
“Nasaun rua, tenki iha komitmentu forte, hodi buka solusaun di’ak ba povu rai rua. Labele haree de’it parte ida. Tanba ne’e, ba oin Indonesia kontinua haforsa kooperasaun ho Timor – Leste, iha parte ekonomia, siguransa no komersiu nian.”
Fatin hanesan sidadaun Indonesia ida ho Naran kompletu Urbanus Bunga Loloon, hanesan misionariu SVD, iha Timor – Leste, hato’o nia sentimentu kontente no fó obrigadu ba Nasaun Rua, maske hanesan sidadaun Indonesia ne’ebé hela iha estranjeiru, maibé liuhosi embaxada no KBRI iha Dili, bele halibur WNI – sidadaun Indonesia sira, hodi partisipa simbolikamente iha seromonia icar bandeira, iha okaziaun proklamasaun ba dala 77.
“Primeiru hanesan sidadaun Indonesia, bele partisipa iha serimonia icar bandeira ne’e, hodi hametin ispiritu nasionalismu no patriotismu, maske hela iha estranjeiru. Esperansa ba oin, amizade Nasaun rua, kontinua di’ak, maibé se bele atividade ne’ebé hala’o ona husi embaixada konaba asuntu desportu, muzika, no seluk tan, bele envolve mós grupu atletismu husi Timor – Leste.” Lian esperansa husi Urbanus Bunga Loloon, hodi termina dada lia ho Jornalista sira.
Observasaun Time Timor nian iha KBRI – Dili, komisaun organizadora kompostu husi Sidadaun Indonesia ne’ebé hela iha Timor – Leste, fahe mós premiu ba manan nain sira, iha atividade despostu ho nia modalidade, atividade kanta no seluk tan, iha ambitu hodi harame loron restaurasaun proklamasaun ba dala 77 (17/8/1945- 17/8/2022). *** (TTM).
Discussion about this post