Dili, 10 – 11- 2026. Maske Prezidente da Repúblika Demokrática Timor-Leste, Dr. José Ramos-Horta, seidauk deklara data fisku ba Eleisaun Prezidensial iha tinan 2027, inklui CNE ka Komisaun Nasional Eleisaun, mos ofisialmente seidauk simu lista kandidatu sira ba Pozisaun kargu Presidente da Repúblika, kandidatu pontesial balu dehan iha esperansa katak, sei manan iha Eleisaun Prezidensial agora tanba desizaun mai husi vontade Popular nian(Votante sira).
“Povu mak sei deside hodi determina se mak bele ba sai Prezidente, hanesan Xefe Estadu simbolu Unidade Nasional. Ha’u fiar katak, sei manan iha Eleisaun Prezidensial agora. Ita tenki fiar aan, lakon ka manan depende ba vontade popular nian. Bainhira manan iha Eleisaun Prezidensial agora, espesialmente ba periodu ida ne’e, promete sai Xefe Estadu ida ba Povu tomak, La’os Xefe Estadu ida ba Governu ka Partidu balu de’it,” kestaun ne’e, hato’o husi kandidatu balu liuhusi media ne’e, iha Dili, inisiu fulan Novembru tinan 2026.
Fo hanoin fali katak, foin lalais iha selebrasaun loron feto, atual Primeiru Ministru RDTL, deklara ona ba públiku katak, sei fo fiar – ka depozita konfiansa ba feto Potensial Timoroan balu(Gender), hodi ba asume fali kargu Prezidente da Repúblika iha Eleisaun Prezidensial iha tinan oin, ne’ebe tuir orariu sei realiza iha fulan Marsu 2027, maske seidauk hatene klaru data ba Eleisaun nian.
Kay Rala Xanana Gusmao, Primeiru Ministru RDTL. Governu Konstitusional da Sia.
Ligasaun ho Eleisaun Prezidensial kandidatu lubuk ida oras ne’e dadaun tu’un ona ba base, hodi halo mini konsultasaun(Kampana), hodi husu apoiu ba sira nia kandidatura, hodi bele kompete mos iha Eleisaun Prezidensial ne’ebe tuir planu sei realiza iha tinan oin agora.
Enkuantu husi parte CNE nian dehan ona katak, oras ne’e Timor – Leste, sai ona membru ASEAN, nune’e sei haree no aumenta tan fali kriteria balu hodi kandidatu Prezidente sira presiza kompleta ho di’ak bainhira hato’o sira nia kandidatura hodi kompete iha Eleisaun Prezidensial ninian. ***(H)
Discussion about this post