Diretor Lalenok Ba Ema Hotu (LABEH), Dr. Christopher Henry Samson, kondena tebes hahalok kruel hasoru Palomita Gusmão Guterres, tanba nia mate, la’os moras, maibe ema seluk mak hasai nia vida, liuhusi hahalok ne’ebe violentu tebes.

Diretor LABEH ne’e dehan, loloos bainhira matebian husu ajuda iha estrada laran, tuir video ne’ebe espalla iha media Sosial, ema ne’ebe halo video, ka rona husu ajuda, tenki foti kedas asaun ruma, la’os halo fali video ka haree de’it, ba aktu hasoru Palomita, nu’udar feto ida ne’ebê, kbi’it laiha, to’o lakon vida.
“Primeiru ami husi LABEH kondena ba hahalok ida ne’e tanba hanesan omesidiu hasoru Joven(feto) no futuru ba Rai ida ne’e. Lamenta mos katak, bibia nia husu ajuda hanesan saida mak fo sai iha media sosial husu “Ajuda Lai” ita labele haree de’it ka halo fali video. Knar ita nian hanesan ema – humana ida – kolega, tenki kontaktu kedas ba polisia, hakilar, hodi bele salva nia vida. Maibe ida ne’e la akontese hodi Palomita lakon vida. Klaru ida ne’e ba ami triste, e konsidera hanesan degradasaun ida eziste iha sociedade nia let no presiza halo reflesaun,” kestaun ne’e, hato’o husi diretor LABEH ba media nasional liuhusi entrevista, iha nia ofisiu Comoro – Dili, loron Sesta(20 – 11 – 2-26).
Diretor ezekutivu ne’e esplika liu tan katak, tanba sa ema iha tempu, hodi hasai foto – halo video, labele foti asaun ruma hodi salva vitima nia moris.
“Ita nia sociedade laiha sentidu humanidade, liu -liu ba sira ne’ebe momentu halo video ka haree direta ba kazu ne’e. Ida ne’e triste tebes. La’os ne’e de’it ita mos lakon ona ispiritu hodi salva ema seluk. Ezemplu bainhira iha situasaun emerjensia hanesan mos dala ruma mosu asidente ruma, ema prefere liu halo video, ka hasai foto, duke buka maneira sira, hodi salva ema sira ne’ebe hetan dezatre. Loloos ita nia prezensa, bele salva sira tanba vida ema ida nian, importante tebes,” hato’o husi diretor LABEH ho espresaun preokupa no triste.
Enkuantu refleta ba asuntu lei, Dirijente LABEH ne’e, rekonese ida servisu justisa nian hodi halo servisu tuir regra ne’ebe iha, tanba suspeitu rasik ba kazu omesidiu hasoru Palomita, mesak entrega aan, hodi tuir prosesu ne’ebe iha.
“Lei mak kondena nia aktu. Suspeitu voluntariamente entrega aan ba polisia hanesan autor. Maibe tenki investiga mos ema sira ne’ebe, ita diskonfia iha relasaun ho kazu refere. Parte seluk kazu ne’e hamosu sentimentu sociedade nian sente preokupa tebes, maibe desizaun hotu iha parte justisa nia knar no responsabilidade. Agora importante ba sociedade atu haree mos kazu omedisiu ne’e, hanesan edukasaun ne’ebe importante”
Entretantu Dr. Christopher Henry Samson, hato’o rekomendasaun balu katak, husu ba Jovetude universitariu sira (Feto – mane), tenki uza didiak liberdade ne’ebe, inan – aman, familia sira fo, tanba bainhira temi kona – ba ransu iha aspeitu rua, negativu no Positivu.

Palomita Gusmao Guterres
“Iha ita nia sociedade komesa moris ona iha ambiente ida era liverdade nia laran, maibe tenki iha mos limitasaun. Husu ba feto, ka mane oan sira ransu tenki difini buat di’ak no buat ne’ebe ladi’ak. Se ita ransu di’ak nia benefisiu mos di’ak. Se ita ransu ladi’ak sei hasoru mos buat aat. Tanba inan – aman, familia, sira hatene ita ba eskola, ba servisu, ba aprende, ba buka osan. Maibe se mosu fali buat ruma parese ita nia ransu mos sala ona.”
Pontu ikus liu diretor ne’e, lori LABEH nia naran, hato’o sentidu Kondolensia ba familia matebian “Palomita Gusmão”. No Harohan mos atu Nai haraik forsa no Kbit ba familia vitima.****(Waihura)















Discussion about this post