Anaprofiko – TL Husu Governu Investe Osan Bot ba Setor Agrikultura

Asosiasaun Nasional Produtor Fini Komersial Timor – Leste(Anaprofiko – TL), liuhusi dirijente masimu, Ilidio M.  Mendonça, husu ba Governu Timor – Leste, ho seriu investe osan ho montante bot ba setor agrikultura, tanba nu’udar setor ida importante tebes ba Nasaun.

Alende ne’e, tatoli lia ba Governu, presiza tebes hodi fó apoiu di’ak liutan ba grupu no asosiasaun agrikultor sira hotu ,ne’ebé rejistadu ona, nune’e bele garante sira nia atividade agrikula la’o ba oin ho kondisaun sustentabel.   

“Setor agrikultura importante ba Nasaun, tanba ne’e Governu tenke apoiu ho montante osan ne’ebé nato’on.   Alende ne’e kria legislasaun ida di’ak, garante direitu agrikultor sira nian. Anaprofiko nia rekomendasaun  ida tan ba Governu katak, maske durante ne’e, iha ona apoiu husi  Governu, maibé tenke buka fasilita finanseira direta ba grupu agrikultor sira hotu – hotu, hanesan motivasaun di’ak ba atividade sira iha base,” lian Presidente Anaprofiko – TL,   hato’o ba  Time Timor liuhosi entrevista iha nia ofisiu, Faulara – Bebonuk, Dili, sesta(23/12).

Parte ida seluk, dirijente ne’e, husu ba Governu, labele kria politika sira ne’ebé, halo povu agrikultor sira sai depende fali ba apoiu ne’ebé durante ne’e iha.

“Ok ita presiza atu fó osan ba povu ne’e bele.  Maibé   tenke haruka sira servisu uluk lai. Labele  fó deit, fó de’it osan. Se nune’e bebeik,  halo baruk povu, liu –liu grupu agrikultores sira,” esplika husi Ilidio.

Knar no Progresu Servisu Anaprofiko – TL Durante 2022

Asosiasaun Nasional Produtor Fini Komersial Timor – Leste(Anaprofiko – TL), mai ho objetivu sira ne’ebé klaru ona, hodi servisu hamutuk mós ho asosiasaun grupu agrikultor sira iha Munisipíu 14.

Informasaun balu husi Prezidente Anaprofiko, Ilidio M. Mendonça katak, vizaun estratejika Anaprofiku nian mak akumula no empodera fini komersial iha Timor – Leste, atu influensia politika fini Nasional ho kualidade di’ak ba kresimentu fini hodi garante soberania fini no seguransa ai – han iha Timor – Leste.

Tanba ne’e, Anaprofiko hamutuk ho asosiasaun hamutuk 70, rejistadu, hodi garante politika fini nasional ho kualidade hanesan Batar(Noi Mutin, Nai no Sele) , Hare Nakroma, Fore – rai Utamua, fore Mungu(kiukai,lakateu, delta no merpati), Fore Keli, ai- farina(ai – uka 2 no 3), fehuk midar (hoho rai 1, 2 no 3), fore mutin no fore metan.

“Durante ne’e, liu –liu iha tinan 2022, servisu hotu la’o di’ak . Ita nia apoiu servisu hamutuk ho asosiasaun sira, haree ba fini, no Governu sosa husi asosiasaun agrikultores sira, depois ida ne’e, distribui ba agrikultor sira iha munisipíu hotu – hotu, hodi kuda iha to’os no natar,” hato’o husi Ilidio.

Progresu seluk hato’o husi dirijete Anaprofiko katak, Anaprofiko sai ona membru asosiasaun agrikultores nivel Asean(AFA), foin lalais iha Konferensia AFA – Filipina iha ne’ebé ofisialmente sai membru permanente ida, iha loron 23 fulan Outubru 2022, hamutuk asosiasaun agrikultor husi Nasaun 13.

“Antes Timor – Leste, sai membru observador ida ba Asean, iha loron 11 fulan Novembru 2022, Anaprofiko – TL, reprezenta grupu agrikultor hotu iha  Timor – Leste, sai uluk ona membru AFA – ASEAN, iha loron 23 fulan Outubru liu ba. Tanba ne’e, 2023 Timor – Leste mós bele ona kandidata aan ba posizaun sira iha AFA nia laran,” Ilidio hato’o ho sentimentu kontente.  

Antes termina dada lian ho media ne’e, Ilidio husu ba agrikultor sira iha Timor – Leste, tenke servisu maka’as, liu –liu ba membru asosiasaun sira hotu, hodi bele lori fini nasional ba oin. Signifika Anaprofiko komunga prinsipiu MAP, nian sai moto ba Anaprofiku – TL “Kuda buat ne’ebé ita han, han buat ne’ebé ita kuda”, Ilidio hato’o fi lozofia  Anaprofiko nian.

“Esperansa ba oin liu –liu iha tinan 2023, liu –liu grupu agrikultor sira hotu, tenke servisu maka’as. Alende ita produs fini, pelu menus loron ida, ema ida – idak iha grupu asosiasaun nia laran, loron ida bele han dala tolu.” Nia  husu.

Pontu ikus liu husu ba Governu, kontinua motiva grupu agrikultor sira, se karik iha peste ka falla iha kolleta, knar Governu nian tenke fó fali fundu ka reembolsa kustu operasional ne’ebé grupu ou agrikultor gasta ona ou liuhusi kriasaun politika fó subsidiu direta la’ós indereta. “”””(TTM)