Presidente Ezekutivu Fundasaun Cristal Agostinho dos Santos Gonçalves, akresenta dezde ezistensia Instituto Superior Cristal (ISC) nian, hahú husi tinan 2001 to’o ona 2022, konsege gradua ona finalista Timoroan (Rekursu Umanu), kuaze rihun lima atus lima(5500).
Tuir Presidente Ezekutivu nia lian, rekursu umanu sira ne’e, kobre ona iha teritóriu nasional, hodi assume kargu xefia sira, balun sai membru Parlamentu Nasional, inklui assume pasta ministru, maibé maioria mak servisu ona iha instituisaun Governu no instituisaun privada sira, iha Timor – Leste.
Informasaun ne’e, hato’o husi Presidente Ezekutivu liuhosi nia deskursu iha serimónia graduasaun Instituto Superior Cristal nian badala sanulu resin hat(14), ne’ebé hala’o iha CCD – Dili, iha loron 29 fulan Dezembru tinan 2022.
Enkuantu ligasaun ho graduasaun ISC nian iha loron 29 fulan Desembru 2022, gradua tan ona finalista kuaze atus lima hat (504).
Foto TTM, 29/12
Husi númeru ne’e, mai husi Fakuldade rua. Fakuldade Siencia Edukasaun(182), no Fakuldade Siencia Saúde(269), inklui mós gradua tan finalista husi kursu mestradu ba tornu datoluk nian iha kursu espesialidade rua, Gestaun Edukasaun no Gestaun Teknologia hamutuk (53).
Haree ba progresu sira ne’e, parte Ministériu Ensinu Superior Siensia no Kultura, liuhusi Ministru atual, hato’o nia apresiasaun ba ISC, hodi rekoñese mós, Instituto Superior Cristal, kontinua la’o ba oin, bainhira kompara ho tinan sira liuba.
“Parabens ba ISC, tanba tinan tolu ba kotuk, kursu mestradu laiha. Maibé tanba esforsu bot, ohin gradua mós finaliza kursu mestradu nian ba faze datoluk ona. ISC kontinua ba oin tanba iha mós klase polo iha munisipíu sira,” rekonese husi diretor Nasional Ministériu Ensinu Superior Siencia no Kultura, ne’ebe reprezenta ministru atual iha CCD, liuhosi nia diskursu, iha okaziaun gradusaun ISC ba dala 14.
Entretantu Reitor ISC, Dr. Sebastião Pereira, husu ba graduadu sira hotu, lori nafatin naran di’ak ISC nian hodi servi Nasaun no povu ho di’ak, tanba graduasaun hanesan fase ida kampus entrega fali ba sociedade nia let.
“Parabens, ohin imi bele gradua. Ida ne’e liuhosi prosesu ida todan, maibé imi konsege. Labele haluha lori siencia sira neebé mak durante ne’e, aprende ona iha ISC. Ba aplika saida mak hetan ona iha sociedade nia let no responsabilidade,” deskursu reitor ISC.
Pontu ikus liu Presidente Ezekutivu mós dehan tan, alumni Cristal tenke kaer metin sistema preventivo Dom Bosco, Razaun, Reliziaun no Domin. Alende ne’e, labele haluha esforsu husi inan – aman nia suporta.
Presidente ezekutivu iha esperansa ida katak, parte hotu tenke servisu hamutuk hodi lori edukasaun iha Timor – Leste, ba oin ho di’ak liu tan.
Foto Media Cristal
“Bainhira Timor – Leste sai membru Asean, sei iha kompetisaun ida maka’as. Tanba ne’e, Fundasaun Cristal, ISC, konta ho apoiu husi Governu, no sei servisu hamutuk ho parseiru nasional no Internasional hotu, hodi haree ba formasaun, treinamentu, sira ne’ebe adekuadu, hodi adapta aan mós ba evolusaun siencia no teknologia ne’ebé oras ne’e, avansa ho lalais tebes”. Nia hato’o hodi hakotu.
Tuir observasaun media ne’e nian, reprezentante graduadu husi finalista 504, ne’ebé reprezenta husi António Armindo,(Vice Ministru Interior, atual), husi kursu mestradu, hato’o lian gratidaun ba parte hotu iha ISC, no Fundasaun Cristal, tanba ho didikasaun, pasensia, domin, tempu, ikus mai konsege gradua tan finalista atus lima hat iha tinan akademiku 2022, no susesu.
“Lori graduadu/a sira nia naran agradese ba dosente sira hotu iha Instituto Superior Cristal, liu –liu ba dosente orientador sira, husi kada departamentu ne’ebé mak iha. Graduasaun la’ós prosesu final husi Estudu nian,” Nia hato’o.
Ikus liu António Armindo, lori graduadu/a tinan akademiku 2022, nia naran hato’o KSOLOK Santo Natal no prospero tinan foun 2023, ba alunu ativu ISC, dosente sira, no parte hotu – hotu. *** (TTM)
Discussion about this post