Autoridade Lokal  Bebonuk Entrega Hikas Osan Restu Subsidiu Dollar 200 ba BNCTL

Xefe suku Bebonuk, Serafin  Masedo, informa katak,  iha loron 30 fulan Desembru tinan 2022, estrutura suku nian hamutuk ho OPS, entrega hikas fali ona osan restu subsidiu dollar atus rua(200), ba BNCTL, ho montante  kuaze sem mil ital dollar Americanu.  

Autoridade lokal ne’e mós esplika, durante  hala’o pagamentu ba aldeia hat iha suku Bebonuk nia laran, benefisia ona xefe familia hamutuk rihun rua atus tolu sia nolu resin rua(2392).

“Tuir lista ne’ebé rejistadu total ficha Xefi familia iha suku Bebonuk kuaze rihun rua atus sia hat nolu resin ualu(2948), maibé foin lalais subsidiu dollar atus rua, iha familia rihun rua atus tolu sia nolu resin rua(2392), mak simu ona subsidiu refere, Alen ne’e, iha lista reklamante(seidauk simu) iha xefe familia na’in lima nolu(50). Sira sei simu iha fase tuir mai,” informasaun ne’e, hato’o husi Serafin ba Time liuhusi entrevista badak iha sede suku Bebonuk, postu Dom Aleixo, Munisipíu – Dili, sesta(30/12).

Observasaun ida husi outoridade lokal ne’e katak, durante  hala’o pagamentu ba benefisiariu sira, sidadaun ne’ebé ho rendimentu liu dollar atus lima(500 dollar), maioria la simu no iha kazu balu, iha oknum membru F – FDTL ida, nia kaben simu duni, maibé ikus mai fo fila osan ne’ebé mak simu ona, ba autoridade lokal.

“Sira hotu be’e simu subsidiu ne’e,  inklui ha’u xefe suku, halo deklarasaun antes foti osan. Iha kazu ida ita nia membru F – FDTL ida nia kaben mai simu, hafoin ida ne’e, konsege fo fali osan mai autoridade lokal. Enkuantu Maioria husi benefisiariu sira kuaze rendimentu menus husi dollar atus lima,” esplika husi xefe suku.

Pesoalmente Serafin rekoñese subsidiu dollar atus rua, tulun tebes komunidade ne’ebé laiha rendimentu mensal, espesialmente hakbiit ekonomia familia vulnerabel sira, hodi festeiza festa Santo natal no selebrasaun simu tinan foun 2023.   

 Parte ida seluk, hatan pergunta ida konaba distribuisaun “Sesta Básica” iha suku Bebonuk, Serafin Masedo, rekoñese aldeia tolu simu uluk ona iha fulan Desembru ne’e, maibé falta de’it ona aldeia 20 de Setembru mak seidauk.

“Sim distribuisaun sesta básika  ba aldeia tolu hotu ona, la’o diak maske iha lista reklamante lubuk ida, maibé só falta de’it aldeia 20 de Setembru tanba kompania ne’ebé manan, ami autoridade lokal seidauk hatene klaru, parese iha fulan inisiu tinan 2023”, nia hato’o.

Dalan Bebonuk seidauk finaliza tanba kestaun indeminizasaun

Xefe suku Bebonuk dehan estrada husi diresaun Delta nian ba parte tasi ibun sai preokupasaun ida ba komunidade sira, tanba tempu udan be’e nalihun iha Estrada laran liu –liu parte Kapela Bebonuk nia oin.

Tuir esteitmentu ida husi xefe suku katak, iha ona kompania balu manan tender hodi rehabilita dalan ne’e, maibé obra ne’e sei paradu hela tanba kestaun indeminazasaun ba uma no moru komunidade nian seidauk klaru.

“Ita nia problema mak dalan. Alende ne’e, ami autoridade lahatene equipa ne’ebé halo  levantamentu ba uma no moru komunidade nian ne’ebé sei indeminizasa husi Governu. Iha ona akordu entre komunidade afetadu maibé seidauk iha solusaun ho parte MOP nian. Atu resolve ami autoridade prontu atu haree ba asuntu ne’e, hodi hein parte rua nia prezensa iha sede suku” Xefe suku esplika ho jestu preokupa.

Antes termina lider komunitaria ne’e dehan, suku Bebonuk durante tinan 2022, laiha konfrontasaun entre grupu arte marsial sira ho frekuensia ne’ebé bot, maske iha hahalok balu mak dala ruma mosu tanba joven sira hemu lanu hodi provoka malu iha dalan.

“Durante ne’e, ita hatene katak,  suku Bebonuk eziste arte marsiais no arte rituais sira, maibé problema ba tinan 2022 ladun iha. Espera tama ba tinan 2023, ema hotu sei moris iha paz no dame nia laran, Sim  joventude balu naksala ba malu ida ne’e, hanesan mós akontese iha fatin seluk,” hato’o Serafin.

Finalmente Serafin Masedo, hanesan autoridade lokal, sarani, hato’o ksolok natal ba sidadaun komunidade hotu iha Bebonuk, dezeiju mós prospero tinan foun 2023, ho esperansa moris iha Dame, paz no harmonia nia  laran hodi fó biban ba prosesu dezenvolvimentu nasional.

“Bo’as festas Santu natal ba imi hotu, maske liu ona, maibé ambiente natal mak dame. Espera tama ba tinan, foun 2023,  ita hotu mai ho hanoin foun, paz, dame no domin iha ema ida – ida iha Timor – Leste laran tomak”. Nia hato’o hodi hakotu.****(TTM)