Empreendedorismu Importante ba Ekonomia Nasional

21/08/2026. Prezidente Ezekutivu Fundasaun Cristal Dr. Agostinho dos Santos Gonçalves, rekonese katak, Asuntu Empreendedorismu importante tebes ba futuru Nasaun ida nian, inklui mós Timor – Leste, tanba bainhira joventude – sidadaun ida, iha kreatividade hodi kria servisu, no dezenvolve negósiu produtivu sira, alende lori benefisiu ba  aan rasik, inklui  ema seluk, ida ne’e kontribui tebtebes ba  ekonomia   iha rai laran.

Prezidente Ezekutivu Fundasaun Cristal Dr. Agostinho dos Santos Gonçalves

“Ha’u haree katak, empreendedorismu importante tebes ba futuru  Timor – Leste. Tanba ne’e, sai ona matéria adisional iha kurikulu Instituto Superior Cristal(ISC), hodi prepara estudante sira, la’os de’it atu buka servisu, maibé mós oinsa bele kria servisu, kria oportunidade no negósiu produtivu sira,” kestaun ne’e, hato’o ba media iha Balide –  Dili, liuhusi entrevista bainhira husu opiniaun kona – ba Papel Joventude no Edukasaun iha área Empreendedorismu.

Tuir Prezidente Ezekutivu katak, dadaun ne’e, ISC – Fundasaun Cristal hakarak prepara joventude ho koñesimentu teóriku no prátiku kona – ba oinsá atu dezenvolve idea negósiu, halo inovasaun, mentoring, peskiza no kolaborasaun no setor privadu no instituisaun relevante nune’e transforma oportunidade sai realidade.

“Ita nia knar buka  mós hala’o formasaun ba Joven sira hodi sai  ema empregadór, la’ós buka de’it sai empregadu ka servisu ba ema seluk,” lian motivasaun husi Prezidente Ezekutivu Fundasaun Cristal.

Mensagen ba Estadu – Governu, Setor Privadu no Populasaun Timor

Ami ho haraik aan, konvida Estadu – Governu atu aumenta apoiu no dudu investimentu iha edukasaun, formasaun professional, inovasaun no empreendedorismu joventude.

Ba Setor Privadu atu loke liu tan oportunidade ba Joventude sira liu husi estájiu, parceria, mentoring, investimentu no merkadu produtu lokal.

Ba Komunidade no populasaun Timor – Leste, ita hotu presiza apoia no valoriza ideia no negosiu ne’ebé Joventude sira kria.

“Investimentu iha empreendedorismu mak investimentu ida importante ba futuru Nasaun. Se ita prepara no apoiu Joventude sira ohin, ita sei hetan emprezariu, inovadór no lider sira ne’ebé bele kria empregu, aumenta produtividade no kontribui ba dezenvolvimentu Sustentável Timor – Leste”.

Pontu ikus Prezidente Ezekutivu Fundasaun Cristal ne’e, rekoñese “Joventude mak futuru Nasaun, no empreendedorismu mak dalan ida atu transforma futuru ne’e sai realidade”. Hato’o hodi hakotu.