Komunidade ho rendimentu ki’ik, ne’ebé hela iha Tasi – tolu, Becora, inklui parte Comoro nian, lamenta hodi rekoñese katak, pulsa eletrisidade iha tinan 2021, la’os lalais tebes, no deskonfia iha tendensia mafia, tanba ne’e, governu tenke haree didi’ak servisu EDTL. ep.
“Tempu sira liuba sei di’ak netik, agora ne’e, pulsa la’o lalais tebes. Se bele Governu tenke kontrola didi’ak hodi regula, se la’e Governu mak oho nia povu. Equipa EDTL nian tama sai uma, obriga tau kontador foun, ida ne’e bele, maibé tenke regula no hatu’un volume pulsa nian, tanba komunidade nia moris lahanesan”, hato’o husi Antonio Baptista nu’udar komunidade ida iha aldeia, Tera Santa, suku Madohi, Dom Aleixo – Dili.
Povu ki’ik kestiona laiha transparensia iha EDTL nia laran
Nia(Antonio) aumenta katak foin lalais, bainhira tuir debate konaba OJE 2022, deputadu balu husi bankada opozisaun iha Parlamentu, kestiona maka’as servisu EDTL nian, liu –liu iha parte pulsa tanba durante ne’e, lai auditoria internal no osan sira ne’ebé koleta husi taxa ka pulsa nian, deskonfia gasta tuir necesidade balu, la tuir prosedimentu legais nian.
“Ami ta’uk mak naran sira E. P bele, sai fali interese ba grupu no habokur parte balu, la haree ba povu nia terus. Iha tempu ida agora, sasan necesidade básika folin karun, Be laiha, estrada iha tasi – tolu ne’eba, hanesan loos mota bot”, sidadaun ne’e hato’o.
Media ne’e, asesu informasaun balu iha eskola Públiku ida iha Dili, situasaun hatudu katak, komputador sira, Jeleira, AC sira sai aat hotu, tanba eskola rasik laiha osan sufisiente hodi hola pulsa.
“Pulsa ida agora ne’e, se ita uza AC, Jeleira, komputador, dollar 10 ohin ita sosa, la to’o loraik de’it hotu kedas. Tanba ne’e, sasan eletroniku nia kuaze besik aat hotu. Lahatene tanba saida mak pulsa ne’e, haksoit lalais, keta buat ruma la’o laloos karik,” lian edukador refere hato’o ba media ne’e, liuhosi entrevista badak iha fulan Desembru 2021.
Haree ba problema ne’e, Time Timor konfirma ona ba parte EDTL , hodi husu tanba sa pulsa la’o lala’is fonte balu dehan, ida ne’e, teknikamente sira lahatene.
“Ami pesoal sira nia servisu mai mota de’it. Pulsa la’o lalais ne’e, ami ladun hatene. Só ema ne’ebé manan tender sosa kontador sira ne’e, mak hatene.”
Antes ne’e, lider nasional balu dehan, eletrisidade Timor nian, karun tebes hanesan mós ho Nasaun riku sira iha Eropa ne’eba. Tanba ne’e, situasaun ne’e, presiza iha atensaun urgente.
“Ita nia eletrisidade ne’e, karun demais. Ha’u lahatene tanba saida. Divia Governu tenke halo klasfikasaun. Ba kompania bot sira oin seluk, kuitadu povu ki’ik sira ita regula hanesan kompania bot sira ida ne’e, susar”.****(TTM)
Discussion about this post