Dirijente Partidu Frente Mudanca(FM), Ricardo Cardoso Neu, rekoñese Timoroan sira ne’ebé ba servisu ona iha rai liur, nu’udar investimentu importante ida, hodi bele hadi’a povu nia moris, liu – liu hadia ekonomia familia uma laran.
Maske nune’e, fó mós atensaun ida katak, bele ba servisu iha rai liur, nu’udar oportunidade maibé labele sai mataros bebeik iha futuru.
“Ami nia partidu la’os ajensia apoiu trabalador. Partidu nia naran Frente Mudança, iha prinsipiu ida hakarak povu ne’e, nia moris tenke iha mudansa. Signifika mudansa iha atetudi, hanoin, no ekonomia. Tanba ne’e, ba atividade ne’ebé konstruktivu hanesan trabalador ba servisu iha rai liur, no atividade positivu sira seluk, ba Frente Mudanca nia pozisaun klaru hodi apoiu tebes, liu –liu ba ajensia legal sira ne’ebé rekruta Timoroan sira, hodi ba servisu iha rai liur bainhira la kontra lei, trafiku umanu nian, no esplorasaun sira,” kestaun ne’e, Ricardo hato’o ba Media ne’e, hodi responde ba preokupasaun balu iha Parlamentu Nasional katak, deskonfia iha partidu balu mós, oras ne’e aproveita tempu fó apoiu ba grupu joventude sira, hodi ba servisu iha rai liur.
Tanba ne’e, Direjente ne’e, fiar katak se ajensia sira mak haruka trabalador ba rai liur, dalan primeiru tenke hetan autorizasaun husi Governu, parte Sefope, ida ne’e partidu apoiu la kestiona.
“Importante mak Governu tenke haree, tanba Sefope de’it labele akumula joven sira hotu. Maibé ajensia legal sira mós tenke foka ba asuntu formasaun, antes trabalador lokal sira ba servisu iha Nasaun liur, ne’ebé presiza tuir ezijensia, la’os partidu mak haruka,” esplika husi Ricardo
Antes termina dada lia ho Jornalista Time Timor , Ricardo husu ba Timoroan sira, liu –liu Joventude feto – mane, hanesan ai – rin ba Nasaun, tenke iha unidade, hodi haree ba asuntu konstruktivu sira, tanba Nasaun Timor – Leste, iha oportunidade barak tebes sa tan foin ukun aan.
“Nasaun ne’e, iha oportunidade oin – oin, depende ba ita atu aporveita. Maibé estabilidade liu –liu entre joven sira tenke di’ak, labele baku malu bebeik. Atu dezenvolve Nasaun ida hanesan Timor – Leste, bainhira Joventude sira hakarak servisu ida ne’e, dalan ba progresu, duke nia sai Mau hais, baruk teen, lanu teen no lakohi servisu. Se lakohi servisu, sai hanesan problema bot ba Nasaun, tanba kada tinan númeru finalista husi nivel sekundaria no ensinu superior sira aumenta babeik.” Nia esplika hodi hakotu.
Entretantu João Belo, sidadaun ida ne’ebé hela iha Dili dehan, servisu iha rai laran di’ak maibé salariu estandar $ 115.00, oinsa bele moris, no hadia vida familia uma laran, sa tan oan barak.
“Kondisaun mak obriga Timoroan sira ba servisu iha rai liur tanba investimentu husi liur menus. Trabalador Timoroan iha diaspora kontribui tebes ba ekonomia Nasaun nian. Ezemplu Governu organiza ba Korea no Australia ida ne’e positivu. Seidauk konta ba servisu iha Portugal, Irlandia, no Inglatera, Problema iha Portugal ligasaun no Timoroan sira uza pasaporte Timor – Leste, ne’e buat ki’ik oan, ita labele hakfodak uluk, Nasaun tenke buka solusaun.” Hato’o husi João.
Media ne’e hakarak relata fali katak, asuntu trabalador lokal iha Portugal, sai hanesan problema ida ne’ebé seriu tanba deskonfia iha ajensia balu mak haruka sira ba maibé lahetan servisu inklui balu toba iha Jardin. Alende ne’e, Irlandia no Nasaun seluk lasimu pasaporte Timor hosi servisu, maibe iha Portugal no España disponivel no simu Timoroan sira hodi servisu maibé la’os iha ofisiu Governu ou kantor.
Problema iha Portugal, Presidente atual Timor – Leste José M. Ramos Horta, no Presidente Portugal Marcelo Revelo, konsege hasoru malu ona foin lalais hodi buka dalan di’ak oinsa resolve hodi buka solusaun imidiatu.****(TTM)
Discussion about this post