Abel Ximenes “Ita Hamutuk 2023 Kontinua Partisipa iha Vida Politika Nasaun nian”

Konsileiru masimu hanesan mós, Ko - Presidente Partidu Frente Mudança, Abel Ximenes(Larisina), husu ba militante Frente Mudança husi nivel base to’o nasional, nafatin unidade, nune’e, iha eleisaun parlamentar 2023 mai, bele liu bareira hodi partisipa mós iha vida Politika Nasaun nian.

Kestaun ne’e, Konseleiru hato’o iha okaziaun hala’o debate ho militante sira, hodi identifika obstaklu iha partidu nia laran durante ne’e, aumesmu tempu selebra Tinan foun 2022, hamutuk ho estrutura CPN – CPP, Frente Mudança, munisipíu Dili, ne’ebé hala’o iha eis Merkadu Comoro – Dili, tersa (04/01).

 Konseleiru ne’e rekoñese liu tan, durante periodu rua iha Governasaun liu ba, Frente Mudança, konsege partisipa ona iha vida Politika Nasaun nian, ida ne’e tanba parte hotu nia esforsu, liuhosi servisu maka’as. 

 “Iha Governasaun rua liuba, Partidu Frente Mudança mós hola parte iha ezekutivu, depois tama fali ba eleisaun antesipa 2017, konsege hetan kadeira ida iha Parlamentu Nasional. Fiar katak eleisaun jeral  2023, kadeira sei aumenta tan,” hato’o ba kuandru sira.  

 Hanesan ema Rejistensia, dirijente ne’e dehan, partidu Frente Mudança, iha prinsipiu ida, sei laiha obrigasaun hodi hatete a’at fali partidu seluk, ka lider rejistensia se – se de’it.

 “Sai Sidadaun di’ak, tama iha Partidu, la’ós sobu fali partidu seluk, ka buka hatete a’at fali lider rejistesia sira. Ida ne’e partidu Frente Mudança la konkorda, tanba partidu hanesan asset ba Nasaun. Ba lider rejistensia hotu, ita tenke respeita sira,” nia husu.  

 Nia hatutan, “Ha’u nia lideransa antes to’o kongresu hili lider sira iha partidu laran, primeiru ita mak respeita uluk malu. Ha’u respeita maun bot Xanana, tanba haree husi tinan nia maun liu ha’u. Maibé, politika ha’u mak partisipa uluk. Iha ha’u periodu hamutuk ho Cesar Moreira, sei buka ho haree ba preokupasaun sira hotu ne’ebé mak iha partidu laran”.  Konseleiru hato’o hodi hakotu.

Fatin hanesan koordenador interinu Partidu Frente Mudansa Munisipíu Dili, Cesaltino Ximenes, husu ba koordenador  partidu nian hotu  husi  nivel aldeia, suku, no postu,  presiza servisu maka’as liutan, nune’e lori Vitoria ba partidu, iha eleisaun parlamentar ne’ebé sei hala’o iha tinan  2023.

 Dirijente ne’e esplika ho klean, durante ne’e, politika ida husi partidu nian, la’ós de’it buka militante ho ibun mamuk, maibé tulun militante sira, liuhosi atividade lubuk ida  hanesan apoiu negosiu, bisnis, inklui kria kooperativa kriasaun nian.

 “Uluk ita nia lider rejistensia sira, hala’o funu hodi liverta patria. Tanba ne’e, ohin loron Partidu Frente Mudança halo mudansa ida, apoiu povu ki’ik sira iha parte negosiu, bisnis, inklui kria kooperativa ba haki’ak balada sira hanesan manu, no fahi, hodi bele hadi’a ekonomia familiar”. Hato’o husi koordenador interinu Munisipíu Dili.  

 Observasaun Time Timor nian, antes hala’o debate ho militante sira, konseleiru Abel Ximenes no nia esposa Laurinda Ximenes, hala’o uluk vizita ba kooperativa kriasaun fahi, iha ne’ebé lokaliza iha Merkadu Comoro. 

 Komentariu ida husi koordenador kooperativa Cesatino Ximenes dehan, kuantidade fini maske foin tinanida maibé hahú barak nune’e iha tempu besik sei distribui fini sira ne’e, ba membru kooperativa sira seluk, hodi kontinúa habo’ot atividade kriasaun ninian.

“Ita tinan 2020, ita hahú ho fahi ne’en, agora aumenta sai barak, nune’e tempu besik sei ditribui fini sira ne’e,  ba ema seluk iha kooperativa laran”. *****(Time Timor)