LABEH : Vizita Sua Santidade Papa Mai TL iha Kualidade Rua

Diretor Lalenok ba Ema Hotu (LABEH), Christopher Henry Samson, rekonese vizita Sua Santidade Papa Francisco, mai Timor – Leste, iha loron 9 to’o loron 11 fulan Setembru 2024, iha kualidade – pozisaun rua,  ida hanesan Xefe Estadu Vatikanu, ida seluk hanesan Lider Igreja nivel Mundial nian.

Diretor Ezekutivu LABEH, Christopher Henry Samson

Nia dehan, Estadu Timor – Leste no Igreja iha duni responsabilidade  bot hodi servisu hamutuk, espesialmente ba serimonia misa iha Tasi – tolu, Dili no serimonia Estadu nian tuir ajenda ne’ebe iha

“Vizita ne’e, iha kualidade rua nu’udar Xefe Estadu no Lider Igreja Mundial nian. Entaun ba Timor – Leste, ida ne’e orgullu bot.  Onra tebes tanba depois vizita João Paulo Segundo, lori ona grasa hetan ukun rasik aan.  Papa Francisco – Nia Prezensa  lori tan grasa foun, dame – Domin, Harmonia ba Timoroan hotu,” Hato’o husi Christopher, liuhusi entrevista badak  iha nia knar fatin – Edifiu LABEH, Comoro – Dili, Segunda(02/09).

Labeh Agradese ba Apoiu sira hotu Durante Vizita Sua Santidade

Iha Oportundade hasoru malu ho media ne’e – Christopher lori LABEH, nia laran hato’o agradese ba parte hotu, liu – liu Governu, parte Igreja lokal no Sidadaun hotu sira nia kontribuisaun , durante simu vizita Sua Santidade Papa Francisco iha Timor – Leste.

“Primeiru la haluha agradese ba Governu – Igreja lokal no Entidade hotu – hotu, nia kontribuisaun liu –liu iha fase konsultasaun pozisaun Papa mai Timor – Leste, inklui mós preparasaun sira antes no depois vizita ida ne’e,” gratidaun ne’e hato’o husi diretor LABEH.

Nia parte agradese mós ba siguransa PNTL – F – FDTL tanba ho vizita Sekretario Geral ONU Antonio Guterres, hodi komemora loron konsulta popular ba dala 25, buat hotu la’o di’ak inklui mós sei mantein kalma iha vizita Sua Santidade nian,” Rekonese husi Christopher.

Votus Bem – Vindo

“Bem Vindo Papa Francisco iha Timor – Leste. Vizita ne’e, importante ba Timoroan hotu, e husu ba Sarani ou reprezentante  ne’ebé sei ba misa iha Tasi – Tolu – Dili, tenke mantein limpeza hodi labele soe foer arbiru,  nune’e hafoer fali ambiente tanba ema barak mak sei partisipa iha misa inklui sidadaun estranjeiru sira. Hatudu ba Mundu katak, Timoroan oan mos bele. Labele misa hotu lixu mos nakonu iha Tasi – tolu. Tau lixu iha nia fatin,” Rekomenda husi Diretor LABEH.

Husi Parte Seluk Kongregasaun Escravas do Sagrado Coração de Jesus, liuhusi Ir. Felizarda da Silva, esplika katak ho prezensa Papa, nian ida ne’e sei habo’ot liu tan fiar nu’udar Sarani, e presiza iha unidade no bele moris iha paz nia laran.

Ir. Felizarda da Silva, Kongregasaun Escravas do Sagrado Coração de Jesus

“Ita Timoroan sira ne’e, ema seluk hatene  – haree ita nu’udar sarani. Maibé  ita nia fiar ne’e, tenke  moris hanesan ema sarani duni. Ba Misa bebeik, e presiza  moris tuir sagrada eskritura nia hakarak. Ezemplu ema rua hadomi malu kultura seidauk resolve, ida ne’e seidauk kaben iha igreja. Espera ho prezensa Papa bele habot ita nia fiar nu’udar Sarani Kristaun e labele hadomi kultura no lisan sira liu fali Maromak,” kestaun ne’e, hato’o husi Ir. Felizarda iha kongresaun Escaravas, Faulara – Bebonuk, Dom – Aleixo, Dili.    

Maske nune’e, esperansa husi Irma Felizarda, refleta ba vizita Papa Francisco, dehan, nu’udar sarani – Povu Timor – Leste Tomak. Ita labele haree malu ho matan ikun bazeia ba diferensa politika, organizasaun sira, rasa, reliziaun ou nasionalidade ne’ebé diferente. Nu’udar illas Maromak nian, importante moris iha domin no dame hanesan Maromak hadomi nia Illas.”

Ir. Felizarda husu mós ba misionariu/a sira iha Timor – Leste, presiza hakbesik aan ba sarani sira hotu, liu – liu hirak ne’ebe moris iha baze, hodi habelar no haklaken di’ak liu tan doutrina Maromak nian ba ema hotu .***(TTM)