Dili, 09 – 11 – 2026. Iha loron 09 fulan Novembru tinan 2026, Instituisaun Edukativa Cristal – IEC, liuhusi Fundador sira ne’ebe reprezenta husi Dr. Agostinho dos Santos Gonçalves, hamutuk ho Reitor ISC – Dr. Sebastião Pereira, edukador nivel tomak, inklui estudante sira husi Instituto Superior – ISC, reprezenta husi eis Primeira Dama Cidália Lopes Nobre Mouzinho Guterres, lansa ona fatuk inan, hodi konstrui kapelina foun ida, iha lokasaun Instituisaun Edukativa Cristal, Balide, Alto – Dili, ho naran kapela Maria Auxiliadora Sarani Sira nia tulun(Capelina Maria Auxiliadora dos Cristao).
Dies Natalis ISC nian ba dala 25 – Ano Bodas de Prata
Antes hala’o lansamentu fatuk inan ba konstrusaun refere, ba dala uluk (tempu dader)liuhusi Pe. Roque Soares da Cruz, O. Carm, hala’o uluk misa agradesimentu ida, hodi komemora loron Dies Natalis Instituto Superior Cristal nian ba dala 25, ne’ebe monu iha loron 5 fulan Movembru 2026(05-11-2001 * 05-11-2026).
Enkuantu refleta ba atividade Dies Natalis ISC nian, hanesan tinan Bodas de Prata(25 Anos), Pe. Roque Soares da Cruz, rekonese katak durante ezistensia Instituto Superior Cristal nian, alende hala’o prosesu aprende nian iha nivel ensinu superior, parte importante ida, la’o hamutuk mos ho asuntu fiar(Evanjelizasaun), nune’e lori ema ba Sabedoria tanba Matenek nia hun loloos mai husi ita nia kriador Lalehan no Rai.
“Futuru ne’ebe di’ak liuhusi edukasaun, nia benefisiu ba familia, sociedade no Nasaun. Parabens ba Instituisaun Educativa Cristal liu -liu Instituto Superior Cristal, tanba ohin loron konsege kompleta tinan 25, iha mundu edukasaun Nivel Ensinu Superior nian. Enkuantu hari’i tan kapelina foun ida ne’e, alende joven sira bele aprende kompleta hamutuk ho fiar, lori ita ba sabedoria tanba matenek nia husi mai husi Maromak,” asuntu ne’e, hato’o husi amu Selebrante Roque, liuhusi nia omilia ne’ebe hato’o ba estudante Instituto Superior Cristal, Edukador, Fundadores Fundadasaun Cristal iha Salaun Futsal – Balide, Dili. Segunda(09-11-2026).
Fatin hanesan depois misa, Intervensaun husi Reitor Instituto Superior Cristal Dr. Sebastião Pereira, refleta ba tinan bodas de Prata(25 Anos ezistensia – ISC) eplika katak, 25 anos hanesan ema ida karik joven ona, nune’e ho espransa, esforsu hodi kontinua ba oin nafatin tuir misaun no vizaun ne’ebe iha ona, espesialmente ligadu ho edukasaun Nivel ensinu Superior nian ne’ebe hala’o iha Timor – Leste.
“Agradese ba fundadores sira hotu konsege hari’i ona Instituto Superior Cristal, iha ne’ebe tinan 2026, dura ona tinan 25. Ita nia ezistensia hala’o misaun imporatnte ida, iha area Edukasaun Nivel Ensinu Superior nian, hodi lori edukasaun ba foin sa’e Timor oan,” gratidaun ne’e hato’o husi Magnifiku Reitor ISC liuhusi diskursu badak.
Maske nune’e, Prezidente Ezekutivu Fundasaun Cristal, Dr. Agostinho dos Santos Gonçalves, refleta ba tinan bodas de Prata, ISC nian(25 Anos Ezistensia)hato’o mos agradese ba Aman Maromak no agradese ba apoiu hotu – hotu, tanba durante ne’e, maske hasoru mos dezafiu balu, maibe Instituto Superior Cristal hamutuk ho parte lubuk ida, konsege lori ona edukasaun Ensinu Superior ba Joven Timoroan sira, la’os de’it iha Dili, inklui to’o ona ba Munisipiu sira, tanba ISC ho moto lori edukasaun ema hotu, ema hotu ba edukasaun.
“Prezensa ISC nian primeiru agradese bot ba Aman Maromak tanba Nia Domin, akompana no Guia ona Fundasaun Cristal – Instituto Superior Cristal, bele to’o ona ba tinan Bodas de Prata. Espera kontinua bele to’o ba tinan Bodas de Ouru nian. Tinan joven ba ISC, reprezenta tinan luta naruk iha inisiu to’o ohin loron, dezenvolvimentu Instituto Superior nian kontinua la’o ba oin , nune’e ita konsege dezenvolve ona programa akademika nian no asuntu akreditasaun Institusional – programatiks, maibe kontinua hadi’a nafatin fasilidade kampus ISC, hodi fasilita di’ak liu tan prosesu ensinu ida ho kualidade. ISC konsege ba ona munisipiu sira, signifika lori edukasaun ba ema hotu, inklui estabelese klase polo sira, iha kursu Edukasaun, Saude no Agrikultura. Signifika edukasaun ba ema hotu. Lori ema hotu ba Edukasaun ne’e rasik”. Hato’o husi Prezidente Ezekutivu FC hodi hakotu.
Observasaun media ne’e nian, durante hala’o lansamentu ba fatuk dahuluk nian iha konstrusaun Kapela foun Maria Auxiliadora dos Cristao iha Balide – Alto, alende hetan prezensa husi fundadores sira husi Fundasaun Cristal, prezensa mos husi eis Primeira Dama Cidália Lopes Nobre Mouzinho Guterres, ne’ebe reprezenta estudante sira husi kampus Instituto Superior Cristal – ISC, tanba dadaun ne’e, hala’o hela estudu nivel Ensinu Supeior iha Instituto Superior Cristal. ****(Waihura).
Discussion about this post