11/09/2026. Xefe Governu Konstitusional da – sia, Kay Rala Xanana Gusmão, rekoñese katak, se igreja laiha karik, lian tetun ne’ebé ita uza agora, labele sai ba lian nasional hodi hala’o komunikasaun iha Timor.

Eis lider Rezistensia ne’e esplika katak, misionáriu sira iha tempu difisil maibé  matenek tebes, hodi hili no uza lian tetun ne’ebé fasil alende hanorin ema Timor, uza mós lian ne’e, hodi hala’o mós  asuntu Envanjelizasaun iha Timor – Leste, ikus mai ohin loron Timoroan barak sai ona sarani no ema hotu konsege ko’alia tetun.   

“Kontribuisaun Igreja nian liuhusi Padre – madre sira importante tebes ba Povu no rai ida ne’e, espesialmente ligasaun ho identidade Timoroan no asuntu fiar nian. Lian tetun ne’ebé, agora ita uza ba lian Nasional, la’ós Governu Portugés mak formula maibé inisiativa no kontribuisaun bot, ida ne’e mai husi parte igreja Timor, liuhusi padre no madre sira ne’ebé, maioria mai husi Italia, España, no Portugal rasik,” Kestaun ne’e, hato’o husi Primeiru Ministru iha Espalada Tasi – tolu, depois misa ikus hamutuk ho Urna bispu nain hat, Kinta, (10/09/2026).

Xefe Governu  rekoñese liu tan katak, papel Igreja nian, la’os de’it ligasaun ho identidade, fiar nian maibé kontribuisaun igreja, apoiu direta ba iha luta Timoroan nian liuhusi aspeitu lubuk ida.

“Iha tempu difisil Amu Bispu Dom Martinho Lopes, Nai lulik sira seluk husi rai liur, inklui Amu Lokateli, madre no padre sira  barak hakarak rai ne’e ukun aan, hodi Povu bele moris hanesan Nasaun Independente ida, hodi tane dignidade ema nian nu’udar nia Ilhas”. Kestaun ne’e, hato’o husi Xefe Governu tanba hetan autorizasaun direta  husi Dom Virgílio Cardeal Carmo da Silva, SDB, lolos Kardeal mak hato’o diskursu, iha enseramentu misa ikus ba Preladus, maibe Kardeal rasik mak hamri’ik husi altar hodi husu ba Xefe Governu atual ikus mai hato’o lia badak, hodi refleta ba kontribuisaun Igreja nian iha tempu difisil, molok lori sai Preladus sira ba halot iha Katedral Dili.

Dom Virgílio Cardeal Carmo da Silva, SDB

Parte hotu iha Tasi -tolu, hato’o agradese ba Bispu nain hat no rekonese legadu, domin, esperansa ne’ebe igreja hala’o ona ba Povu ida ne’e, liu -liu habo’ot ezistensia uma kreda iha Timor – Leste no Azia.