31/08/2026. Prezidente Ezekutivu Fundasaun Cristal, Dr. Agostinho dos Santos Gonçalves, refleta ba Transladasaun Restus Mortais Preladus(Bispu) Na’in hat iha Timor – Leste, dehan, transladasaun restus mortais husi Dom Jaime Garcia Goulart, Dom Jósé Joaquim Ribeiro, Monsenhor Martinho da Costa Lopes no Dom Alberto Ricardo da Silva, iha Nasaun ne’e, la’ós de’it eventu Relijiozu, maibé momentu ida ne’e, iha signifikadu boot ba iha fiar, memoria no Istoria.
Prezidente Ezekutivu mós esplika katak, Prelados sira ne’e, fó ona sira – nia moris no dedikasaun ba Maromak, Igreja no Povu Timor – Leste, iha tempu ne’ebé la-hanesan.
“Sira liuhosi situasaun no periodu istóriku ne’ebé diferente, maibé iha objetivu ida de’it : hodi fo sai lia fuan Maromak nian, hametin fiar no akompaña Povu ida ne’e, iha nia dalan moris ninian,” kestaun ne’e hato’o husi Prezidente Ezekutivu liuhusi entrevista badak, ne’ebé hala’o iha Balide – Dili, Segunda(31/08).
Hanesan sarani, Prezidente Ezekutivu mós esplika, Sira – nia dedikasaun hatudu mai ita katak, fiar – fé, la’ós de’ ita ko’alia ka reza iha Igreja, maibé moris ho domin, sakrifisiu, servisu no solidariedade ba ema seluk.
“Liuliu ba ita Timor – Leste, sira – nia legadu importante tebes ba Igreja tanba Igreja iha papel boot iha Edukasaun, Formasaun Joventude, Defende ema nia dignidade no hametin esperansa povu ne’e nia nu’udar kriatura Maromak nian,” hato’o husi Prezidente Ezekutivu
2. Esperansa saida mak ita bele hetan husi transladasaun ida – ne’e, liu -liu ba sarani sira iha Timor – Leste
Fotografia Dom Jaime Garcia Goulart, Dom Jósé Joaquim Ribeiro, Monsenhor Martinho da Costa Lopes no Dom Alberto Ricardo da Silva
Prezidente Ezekutivu rekonese katak, husi transladasaun ida – ne’e, bele sai sinal ba esperansa no unidade ba katólika sira iha Timor – Leste.
“Sira fila mai bele lembra ita katak, maske iha tempu difisil, ita kontinua hametin fé – fiar ba Maromak no la lakon esperansa. Ba Igreja no sarani Timor – Leste, ida ne’e mós oportunidade ida atu haree fila ba ita – nia istória no husu ba ita – nia aan rasik : Saida mak ita bele halo atu kontinua sira – nia misaun no sira nia legadu,”
“Ha’u hanoin katak, resposta mak ita tenki harii Igreja ida ne’ebé unidade Solidária, responsavel no besik ba Povu, liuliu ema kiak, família, labaraik no Joventude”
Tuir esplikasaun husi Prezidente Ezekutivu katak, ba Fundasaun Cristal, ida ne’e mós iha ligasaun ho Edukasaun no formasaun iha ne’ebé hakarak Joventude sira aprende hosi – sira nia ezemplu, atu iha fé, disciplina, integridade no espiritu servisu.
“ Ha’u hakarak hato’o mensajen ida sarani sira iha País ne’e: mai ita simu preladus nain hat ho respeitu no gratidaun. Mai ita haree sira nia memoria hodi ema sira ne’ebé liu ona, maibé sai inspirasaun ba ita, nafatin moris ho fé, esperansa no amor, hamutuk harii Timor – Leste ida ne’ebé dame, justu no di’ak liutan. Sira – nia restus mortais fila mai Timor – Leste, maibé sira – nia fé, sira – nia amor no sira nia legadu tenki kontinua moris iha ita hotu”. Hato’o hodi hakotu.
Enkuantu tuir ajenda Governu no Igreja Timor – Leste, hamutuk ho sarani sira espesialmente iha Diocese Dili, simu urna bispo nain tolu husi Bali – Indonezia, transporta husi Aviaun Aero Dili, to’o iha Aeroportu Prezidente Nicolau Lobato, iha loron 1 fulan Setembru tinan 2026.
Discussion about this post