Luis Valentim J.M.S dos Santos, ne’ebé estuda iha Universitas Muhammadiyah Malang(UMM), tersa (23/08) ne’e, mais ou menus tuku salunu otl, hala’o ona ezame proposta segunda fase iha Kampus Instituto Superior Cristal, liuhosi via online liga direta hodi hamutuk ho dosente orientador sira iha UMM.
Prosesu ezame ne’e, ho durante oras ida ho balu, la’o di’ak tebes, nune’e, Luis Valentim konsege hakat ona ba fase peskiza nian iha Ministériu rua, mak hanesan Ministériu Solidariedade Sosial(MSSI) no Inkluzaun, inklui Ministériu Edukasaun Joventude no Desportu(MEJD).
Titlu ne’ebé Luis Vanlentim hili hodi akaba nia kursu iha nivel doutoramentu mak “Reformasi Birokrasi Dalam Meningkatkan Sumber Daya Manusia di Dili, Timor – Leste.
Tanba ne’e, Luis dehan, iha tinan 2019, nia hamutuk ho kolega nain neen seluk, hala’o estudu iha UMM, maibé ho kestaun pandemia ne’ebé ita naran Covid – 19, prosesu estudu muda fali ba via online.
“Ami ho kolega lubuk ida mak hala’o estudu iha UMM, hahu tinan 2019. Tanba Covid- 19, paradu ituan nune’e liu fali husi via online, ida ne’e Instituto superior Cristal estabelese kooperasaun diretamente ho Universitas Muhammadiyah Malang (UMM),” Luis hato’o asuntu ne’e, ba Time Timor liuhosi entrevista badak iha kampus Cristal – Balide, tersa(23/08).
Kandidatu doutoramentu ne’e iha esperansa ida dehan katak, – Ho peskiza ne’e, sai hanesan kontribuisaun ida, hosi sujere hanoin ba Governu, bele hadia netik birokrasia iha Timor – Leste, espesialmente liga ba atetude atendimentu públiku nian, ne’ebé presiza hadia tanba sidadaun ne’ebé hetan atendimentu husi servidor Estadu, dala barak sei haleri’ik.
Observasaun Time Timor nian iha Kampus Instituto Superior Cristal durante ezame iha edifisiu Mikru Teaching, – Cristal Balide, Dili, asiste direta husi dosente copromotor na’in rua, atual Reitor Instituto Superior Cristal, Dr. Sebastião Pereira, MM, hamutuk ho Presidente Ezekutivu Fundasaun Cristal Dr. Agostinho dos Santos Gonçalves, MM, no partisipa mós husi kandidatu doutoramentu sira seluk. Hafoin ida ne’e, kandidatu ida ho naran Rafael Savio mós hala’o ezame segunda fase hodi hakat ba peskiza.**** (TTM)
Discussion about this post