Mariano Asanami: “Presiza Investe Maka’as Ba Setor Edukasaun”

Relasiona ho debate Osamento Geral Estado (2021), foin lalais iha fase espesialidade deputadu sira iha Parlamentu Nasional(PN), liuhosi Mariano Asanami Sabino, husu atu hasa’e  montante osamentu ba setor edukasaun, tanba fasilidade iha kampus no eskola teknika sira iha Timor, kontinua menus hodi afeta ba prosesu ensinu nian.

Nia dehan tan, iha universidade Nasional Timor Loro Saé   no eskola teknika balu tanba fasilidade menus ida ne’e, difikulta fali estudante sira hodi hala’o pratika, iha area ne’ebé sira estuda ba.

“Ita nia estudante sira presiza fasilidade labotoriu ne’ebé sufisiente. Timoroan sira atu sai matenek, Estadu presiza investe maka’as ba setor save – Edukasaun nian,  tanba sira mak rekursu ba rai ida ne’e. Realidade hatudu universidade balu oras ne’e, kontinua menus tebes ba fasilidade hodi hala’o pratika.” Lian deputadu Asanami iha parlamentu Nasional fulan Dezembru 2020.

Eis ministru Agrikultura no Peska ne’e, aumenta liu tan, presiza duni no labele diskuti hodi tau osamentu bot para resolve tiha kestaun sira ne’ebé mak, setor edukasaun hasoru, durante ne’e.    

Entretantu, relasiona montante OGE 2020 – 2021, lian sociedade Civil balu  dehan, mesmu Na’I deputadu sira diskute maka’as iha parlamentu hodi aprova OGE, montante barak liu só hodi ba funsioná de’it makina Estadu,  maibé bele dehan,  osamentu ba setor seluk kontinua hasoru problema.   

“Oinsa ita bele hasa’e ita nia produsaun iha setor Agrikultura, se ita nia OGE maioria só bele halo funsiona de’it mákina Estadu. Se akontese nune’e, ba setor seluk kontinua hasoru problema inklui mós setor edukasaun ne’e rasik.”

Sujestaun balu dehan, loloos Timor – Leste nia ukun na’in sira, ba ida ne’ebé Governa, presiza buka  servisu hamutuk, no iha vizaun ida de’it para deskute asuntu ne’ebé di’ak ba Nasaun iha setor hotu, liu –liu setor save hanesan Edukasaun, Saúde no Agrikultura.

“Ita nia problema ida mak, setor sira hanesan agrikultura ladun  dezenvolve ho di’ak tanba durante ne’e, foku atensaun de’it ba kestaun politika ne’ebé ladun kontruktivu. Tanba ne’e, ita nia merkadoria, sasan sira husi liur mak kontinua domina. Se karik hanesan ne’e bebeik, no situasaun la muda, ita kontinua depende ai – han husi rai liur. Ba fali setor edukasaun eskola barak kontinua aat, atu resolve presiza osamentu ne’ebé sufisiente.” Lian husi Públiku ***(H)