IEC Realiza Misa Abertura ba Tinan Eskolar 2022

Instituisaun Edukativa Cristal (IEC), iha loron 6 fulan Janeiru tinan 2022, liuhosi amu kapelaun Cristal Manuel Pinto, SDB, hamutuk ho fundador Cristal nian, estudante, no edukador nivel hotu, realiza misa asaun grasa hodi husu tulun, bensaun, no husu kbi’it ispiritu santu nian, nune’e  tinan eskolar 2022, bele la’o ba oin  ho di’ak.

Relasiona ho selebrasaun eukaristia ne’e, amu kapelaun dehan, ho misa ne’e, alende husu grasa ba Maromak, hodi haraik kbi’it, forsa, maibé ba edukador sira mós, presiza hala’o knar ho responsabilidade, domin, tanba eduka ema la’ós fasil no tuir hakarak.

“Ita eduka ema la’ós atu siak, baku, no hakilar ka hanorin de’it konaba materia. Maibé knar hanesan edukador presiza eduka ho domin, pasensia, nune’e, ikus mai nia rezultadu mós sei sai di’ak,” hato’o husi amu kapelaun liuhosi nia omilia iha Salaun enkontru IEC, Balide – Dili, kinta (06/01).

Bibi atan ne’e esplika ho klean katak, Jesus halo buat hotu, no to’o mate, tanba domin. Tanba ne’e, hanesan edukador ne’ebé di’ak, presiza iha pasensia, hodi akompaña, estudante sira ba dalan ne’ebé loos.

Fatin hanesan Presidente Ezekutivu Fundasaun Cristal Agostinho Gonçalves, hafoin misa, liuhosi nia palestra badak dehan,  ho misa abertura ne’e, selebra mós Natal hamutuk ho familia boot Cristal nian, hodi fahe domin ba malu ho esperansa foun katak,  tinan eskolar 2022, atividade konaba ba prosesu aprendizajen, bele la’o ho di’ak liutan.

Entretantu relasiona ho ativida hotu iha Cristal durante tinan 2021, relatoriu ne’ebé hato’o husi Reitor Instituto Superior Cristal, Sebastião Pereira, hanesan mós presidente komisaun ba atividade tomak temi katak,    atividade prosesu aprendizajen iha kampus Sentral no polo ISC nian, inklui atividade importante sira seluk mós, la’o ho di’ak maske tinan 2021, hasoru situasaun Covid – 19.

“Durante tinan 2021, atividade hotu konaba kampus nian maske iha tempu Covid, kontinua la’o  di’ak. Konaba Prosesu aprendizajen uza online, kuaze 73 %, mak estudante asesu materia. Alende ne’e ita mós esforsu maka’as tebes ba akreditasaun institusional no akreditasaun programatika ne’ebé hala’o husi ANAAA”. Hato’o husi Reitor.

Relatoriu progresu daruak nian, hato’o husi Diretor Eskola Sekundariu Cristal, Rafael Savio temi katak, eskola filial  Sekundaria nian, Dili, Maliana, Aileu, Same, Viquque no Tecvoc Suai, la’o ho di’ak.

“Atividade hotu la’o ho di’ak, nune’e estudante sira konsege tuir ezame nasional no ezame lokal iha eskola Sekundaria Cristal Dili no filial hotu ho susesu. Fiar katak tinan foun 2022, sei sai di’ak liu tan”. Diretor hato’o hodi hakotu.

Maske nune’e, vice Reitor Instituto Superior Cristal Jacinto de Oliveira Junior hatete, atividade iha instituto Superior Cristal ba oras ne’e, kontinua la’o ho di’ak, no komesa ona simu estudante foun tinan akademiku 2022, iha fulan Desembru 2021.

“Sim ba tinan ne’e, ita simu ona estudante foun iha fulan Desembru foin lalais. Ami sei simu estudante tuir regulamentu ne’ebé iha, mas ita nia kondisaun hahú husi loron ba loron kontinua sai di’ak. Tanba ne’e se – se bele mai eskola iha Instituto Superior Cristal.” Nia husu.  

Observasaun Time Timor iha eskola Cristal, antes hala’o misa abertura ba tinan eskolar foun 2022, iha dadeer, hala’o mós atividade meditasaun nian, ne’ebé preside husi Presidente meditasaun Timor – Leste, Florentino Sarmento.

Alende ne’e, lansa mós kanta husi Instituto Superior Cristal nian ne’ebé oras ne’e espalla ona media social iha parte Youtube nian, no titlu “Viva, Viva Instituto Superior Cristal”. ****(Time)