Kongregasaun FMA Hala’o Certame iha Cristal Hodi Komemora Tinan Ezistensia

Responsabel kogregasaun St. Mary Domenica Mazzarello (FMA), Me. Evangelina Xavier, hateten ba tinan 2022, hodi komemora ezistensia kogregasaun nian ba dala atus ida lima nulu(150), kongresaun madres FMA, servisu hamutuk ho Instituisaun Edukativa Cristal, hala’o certame iha eskola Cristal.

Esplikasaun ida husi dirijente ne’e, dehan katak atividade kadi kakutak ne’e, envolve estudante nivel ensinu básiku to’o ensinu superior Cristal, durante loron rua(15-16/07) ho objetivu prinsipal ida oinsa hanorin estudante/sarani bele koñese di’ak liu tan kongregasaun FMA, no nia fundadora mak ho naran Maria Domenica Mazzarello, liuhosi “Quis Santa Maria Domenica Mazzarello, 150 anos”.  

“Objetivu certame ne’ebé ami hala’o iha Instituisaun Edukativa Cristal, tanba eskola Cristal, nu’udar eskola salesiano Dom Bosco. FMA mós konsidera Dom Bosco hanesan aman/Fundador, nune’e ami hakarak estudante Cristal, bele koñese di’ak liutan kongregasaun FMA, iha Timor – Leste”, esplika husi me. Evagelina ba Jornalista sira, liuhosi entrevista badak iha salaun enkontru Cristal – Balide, sabádu (16/07).

Parte ida resposabel ne’e, iha esperansa ida katak, ba tinan sira mai, kogregasaun sei kontinua realiza atividade hanesan (Certame), inklui  atividade seluk, la’ós de’it iha Dili maibé sei to’o ba Munisipiu sira, hodi bele eduka no lori estudante joven ba dalan di’ak hodi bele moris tuir sistema preventivo  Don Bosco.

Iha fatin hanesan Presidente Ezekutivu Fundasaun Cristal Agostinho dos santos Gonçalves, rekonese durante ne’e, eskola Cristal mak sempre hala’o certame iha fulan Juñu, hodi komemora loron ezistensia fundasaun nian, maibé ba tinan 2022, agradese tebes ba madre sira husi kongregasaun FMA, bele realiza Certame iha Instituisaun Edukativa Cristal.

“Sim ita agradese ba kongresaun FMA, tanba foin badala uluk realiza Certame iha eskola Cristal, hodi bele eduka ita nia joven nu’udar sarani katolik sai sidadaun ne’ebé di’ak. Tanba ne’e, tinan sira mai, sei kontinua atividade ne’e, ho razaun Cristal no kogresaun FMA hari’i husi salesiano ne’ebé nia fundador mak São João Bosco”.  

Tuir observasaun husi Time Timor, antes sesaun ba abertura certame, grupu husi kogregasaun FMA, hala’o uluk aprezentasaun drama badak ida konaba oinsa Santa Maria Domenica Mazzarello, hahú nia jornada moris to’o harii kongresaun ida, hodi atende joven feto sira iha tempu ne’eba.****(Time)