Presidente Ezekutivu Fundasaun Cristal, Agostinho dos Santos Gonçalves, hateten eskola Cristal temporariamente hapara atividade ensinu, durante loron rua, hahú 8 to’o loron 9 fulan Marsu, hodi hein desizaun ruma husi parte Ministéiru Edukasaun Joventude no Desportu.
Lider ezekutivu ne’e mós esplika katak, tanba parte Ministériu Saúde iha loron 07/03 deklara katak, iha sidadaun rua ne’ebé hela iha Tasi – Tolu(BTN2), hetan moras Covid- 19, nune’e husu ba eskola sira iha kapital Dili hapara temporaria atividade ensinu nian, nune’e Instituisaun Edukativa Cristal liuhosi enkotru entre diretór sira, fó ferias ba estudante nivel tomak hahú husi eskola primária ba to’o nivel Ensinu Superior.
“Enkontru ohin dadeer ho diretor sira, ami diside temporariamente hapara lai atividade ensinu nian, durante loron rua, komesa loron 8 to’o loron 9 fulan ida ne’e. Maibé ami mós hein desizaun ruma, husi parte Ministériu Edukasaun Joventude no Desportu.” Dehan Presidente ezekutivu Fundasaun Cristal, liuhosi nia entrevista ho jornalista sira iha eskola Cristal segunda, (8/3).
Maske nune’e, lider ezekutivu ne’e mós kontinúa husu ba estudante hotu iha Timor laran tomak, kontinúa respeita ba regra prevensaun Covid nian, ne’ebé fó sai ona husi parte Saúde hamutuk ho parte Edukasaun.
“Mai ita hotu kontinúa respeita ba regera prevensaun Covid nian, no labele haluha fase liman bebeik. Estudante sira hotu, liu –liu iha Cristal, labele haluha pratika distasiamentu sosial, inklui kontaktu fisiku nu’udar dalan primeira ba prevensaun Covid – 19.” Nia husu hodi hakotu.
Entretantu, observasaun husi Jornalista Time, ba eskola lubuk ida hanesan Eskola 4 Setembru Unamet Dili, 10 de Desembru no sira seluk, maioria ohin dadeer (08/03), laiha atividade ensinu, maske estudante sira kumpri orario hodi ba eskola, maibé kuandu to’o iha resintu eskola ida – idak, siguransa eskola, hamutuk ho parte profesor sira, haruka estudante hotu fila ba uma, hodi hein desizaun husi parte Ministériu Edukasaun Joventude no Desportu. ****(Time)
Discussion about this post