Serka Sanitária no Konfinamentu Obrigatóriu ne’ebé Governu estende ba segunda fase, iha kapital Dili no Munisípiu, fó impaktu tebes ba estudante Timoroan, nune’e tenke lakon tempu barak iha uma, duke tuir prosesu aprendizajen iha eskola.
Ligasaun ho asuntu ne’e, estudante balu iha kapital Dili hato’o razaun balu katak, sira la ba eskola no hela de’it uma, tanba eskola hotu feriadu, bazeia ba desizaun Governu nian, ligasaun ho implementasaun Serka Sanitária ba segunda fase to’o fulan Abril 2021.
“La’ós ami mak lakohi ba eskola, iha fulan Abril depois serka sanitaria hotu ami ba fali ona. Oras ne’e, kolega sira la ba eskola tanba tauk ho Corona.” hato’o husi Juladio João Ximenes ba Jornalista Time – Timor, iha nia residensia Bebonuk – Dili, segunda (17/3)
Estudante nivel primária ne’e, mai husi eskola Maria Auxiliadora Comoro – Dili, hato’o mensajen badak ida katak, importante liu ba estudante feto – mane, bainhira ba fali eskola, tenke uza maskara, fase liman bebeik ho sabaun, atu bele do’ok husi virus Corona.
Entretantu, Piere Noko V.N Martins, estudante ida husi Eskola Primária São Carlos Aimutin, hateten maske feriadu no hela de’it iha uma, maibé sira nia edukador balu, kontinúa fó trabalho de Casa ba sira hodi priense, nune’e, tama fali ba eskola, sei entrega ezersisiu hotu ne’ebé iha para hetan valor tuir lisaun sira.
“Maske ami la ba eskola, durante domingu rua ona, profesóra sira kontinúa manda ezersisu husi via whatsapp hodi ami priense de’it iha uma.” Nia dehan.
Estudante ne’e mós esplika, dezde implementasaun Estadu Emerjensia dahuluk, to’o tempu realizasaun Serka sanitaria, alunu sira husi eskola São Carlos, maske hela de’it iha uma maibé iha avizu ruma, ka kontaktu ho inan – aman sira, utiliza de’it via whatsapp.
iha fatin ne’ebé lahanesan Desty G Jahana dehan, durante situasaun Serka sanitaria, ho familia sira hela de’it iha uma tasi – tolu.
Estudante nivel Sekundária husi eskola São Pedro – Comoro ne’e, hatutan kuandu parte saúde sira ba evakua ema na’in rua iha Tasi – tolu parte BTN2, tanba sira hela besik kedas, nune’e ho familia sira hela de’it iha uma besik semana tolu resin.
“Durante ne’e, ami hela de’it iha uma tanba iha Tasi – Tolu ne’e, liu – liu parte BTN 2, deskonfia ema balu hetan moras Corona. Ami ta’uk la la’o sai.” Nia hato’o hodi hakotu.
Enkuantu, ligasaun ho implementasaun Serka sanitaria iha kapitak Dili, iha primeira fase nian, eskola lubuk ida iha Dili laran hanesan Cristal, liuhosi nia dirijente sira uza mídia deklara hodi hapara temporaria lai prosesu aprendizajen.
Maske nune’e, eskola hotu sei kontinua hein desizaun husi Governu, espesialmente parte Ministériu Edukasaun Joventude no Desportu, hodi reatividade fali prosesu ensinu nian ****(TMM)
Discussion about this post