Governu liuhosi Ministériu Solidariedade Sosial no Inkluzaun(MSSI), apoiu fós saku 85, ba estudante universitáriu husi Instituto Superior Cristal. Atividade apoiu sosial ne’e, realiza iha kampus Cristal, domingu (21/3).
Reitor Sebastião Pereira, ne’ebé simbolikamente simu apoiu ne’e hateten, apoiu fós ne’e, hodi haree liuba estudante ne’ebé hela iha kost, espesialmente ba hirak ne’ebé mai husi Munisípiu.
“Apoiu ida ne’e, la’ós ba estudante Cristal tomak, preoridade liuba estudante semester ida to’o finalista sira, ne’ebé hela iha kost. Sira merese duni, tanba ho situasaun konfinamentu obrigatóriu, maioria ne’ebé mai husi Munisípiu labele kontaktu ho inan – aman sira, hodi hetan osan no apoiu ai – han ruma,” dehan Reitor iha salaun enkontru Cristal – Balide, antes simu apoiu ne’ebé, diretamente entrega husi vice Ministra Solidariedade Sosial no Inkluzaun, Signi Candrawati Verdial.
Fatin hanesan Signi Candrawati Verdial, lori Governu nia naran hato’o agradese ba Instituto Superior Cristal, tanba bele ajuda ona programa Governu nian, hodi apoiu estudante Timoroan ne’ebé hela iha kost iha Dili laran, liu –liu iha tempu implementasaun Konfinamentu obrigatóiru.
Nia mós husu ba benefisiariu hotu katak, utiliza didiak apoi ne’e, maske ituan maibé importante liu mak, bele hakman netik estudante sira nia hakerik, konaba ai – han iha tempu difisil ida ne’e.
“Agradese ba Cristal, tanba realiza programa ida ne’e, ho esforsu oin –oin. Ba Governu nia haree katak, Covid – 19, afeta ba buat hotu – hotu. Tanba ne’e, maske apoiu ida ne’e simples maibé simu ba, no husu desculpa tanba tarde ituan.” Vice Ministra hato’o.
Entretatu diretor Jeral Ministériu Ensinu Superior Siénsia no Kultura Maria Fernanda Lay, konsidera katak apoiu refere, fasilita tebes estudante universitáriu sira hotu ne’ebé mak hela iha kost tanba dok husi inan – aman.
“Agradese ba parte rua nia servisu hamutuk, iha tempu ida difisil hodi apoiu ita nia estudante ensinu superior sira iha parte ai –han. Fiar katak sei iha tan apoiu seluk ba estudante sira iha tempu tuir mai.” Nia hato’o.
Presidente Ezekutivu Fundasaun Cristal, Agostinho dos Santos Gonçalves relata, ba estudante sira ne’ebé balun seidauk hetan apoiu ne’e, iha fase dahuluk, parte Cristal kontinua servisu hamutuk ho Ministériu Solidariedade Sosial no Inkluzaun inklui parte Ensinu Superior Siénsia no Kultura hodi bele apoiu iha fase tuir mai.
“Ba sira ne’ebé iha fase dahuluk seidauk hetan, sei iha fase tuir mai. Ba Ida ne’ebé hetan ona apoiu ne’e, tenke agradese ba Maromak tanba tempu difisil ida ne’e, ita bele hetan netik apoiu ruma husi Governu maske ituan.” Hato’o husi lider Ezekutivu Fundasaun Cristal.
Enkuantu estudante Maria Fatima Caet, nu’udar benefisiara ida husi Instituto Superior Cristal hato’o agredese ba parte Governu, liu –liu Ministériu Solidariedade Sosial, kampus Instituto Superior Cristal no mós Ministériu Ensinu Superior Siénsia no Kultura, tanba bele responde sira nia pedidu, konaba ai – han iha tempu serka sanitariu no Konfinamentu Obrigatóriu.
“Ami labele nega, iha kost ami susar duni ba ai – han. Ha’u mai husi Oecuse, ro’o lamai ida ne’e susar ba ami, ho maun alin sira seluk.” Nia haktuir ho sentiment triste.
Observasaun Jornalista Time – Timor ba lista provosoria ne’ebé Governu no kampus sira fasilita iha fase dahuluk nian, kada Instituisaun Universitáriu sira mai ho lista benefisiara ne’ebé lahanesan. Tanba ne’e iha ona Unversidade hat mak hetan uluk apoiu refere mak hanesan:
- DIT kuaze estudante 373 mak sai benefisiarius
- IOB kuaze estudante 726 mak sai benefisiarius
- Unpaz 1510 mak sai benefisiarius
- Cristal estudante 85 mak sai benefisiarius. ***(H/O)
Discussion about this post