Atu hado’ok estudante sira husi konflitu, Instituto Superior Cristal(ISC), kuarta(22/09), semana ne’e, servisu hamutuk ho AGIAMONDO – SCP Serviço Civil para a Paz, realiza formasaun Edukasaun da Paz, hodi haree liuba formasaun karakter nu’udar dalan prevene konflitu.
Koordenator Civil Peace Servisu AGIAMONDO(Alemaña), Timor – Leste, Stefan Hlavac, hateten nu’udar estudante universitariu tinan akademiku foun, presiza tuir formasaun karakter nian, hodi nune’e, iha prosesu aprendizajen bele hamosu ambiente paz entre alunu, inklui dosente sira.
“Formasaun ida ne’e, importante ba estudante universitariu, hodi bele prevene no resolve konflitu. AGIAMONDO nia envolvimentu no servisu hamutuk ho Cristal, lori esperensia balu husi Eropa ne’eba, liga ho kondisaun iha ne’e, hodi halo prevensaun konaba konflitu,” temi husi Stefan.
Koordenador ne’e rekonese tan, hanesan ema akademiku ka estudante universitáriu, hakarak ou la’e, tenke kria paz no dame, iha ne’ebé de’it.
Fatin hanesan, Reitor Instituto Superior Cristal, Sebastião Pereira, rekonese, iha tempu Portugés Timoroan nia moris iha karakter hanesan ema Portugés. Nune’e mós tempu Japones, no Indonesia.
“Iha era lubuk ida Timoroan sira liu ona hodi hasoru esperensia moruk konaba konflitu. Tempu Portugés, Japaun no Indonesia nakonu ho violensia. Tempu ukun aan, hodi hamenus numeru konflitu ho neneik, dalan ida mak formasaun ka liuhosi edukasaun ba Paz, iha kampus, nune’e bele hamenus konflitu iha familia, Sociedade no Nasaun.” Lian reitor hodi termina. **** (Time Timor)
Discussion about this post