Pe. Locateli – Fundadores  FC Lansa Fatuk Dahuluk Konstrusaun Edifisiu Foun FE- ISC  

Pe.Elisio Locateli, SDB hamutuk ho Fundadores Fundasaun Cristal nian (FC), reprezenta husi Prezidente Ezekutivu Fundasaun Cristal Dr. Agostinho dos Santos Gonçalves MM, hala’o lansamentu fatuk dahuluk hodi konstrui edifisiu foun andar tolu partense ba Fakuldade Edukasaun(FE), iha Instituto Superior Cristal(ISC).

Atividade Importante ne’e, realiza iha Kampus sentral Cristal, Balide – Dili, iha loron 11 fulan Outubru 2023, iha ne’ebé hetan prezensa husi parte reprezentante Ministériu Ensinu Superior Siensia no Kultura, hamutuk ho dosente, edukador, estudante Instituto Superior Cristal nian,  bainaka espesial sira hanesan Presidente Federasaun Nasional Antigus Alunus Salesiano Dom Bosco Timor – Leste(FNAADB- TL),  Azevedo Marcál.

Ligasaun ho Lansamentu ne’e, Reitor ISC, Dr. Sebastião Pereira, MM esplika fasilidade kampus nian importante ba estudante sira, hodi bele hala’o prosesu apredizajen ida ho di’ak tanba ne’e, planu hamutuk ho parte Fundasaun Cristal nian hari’i tan edifisiu foun ho sala 18, iha ne’ebé preve osamentu ba konstrusaun fase dahuluk nian kuaze besik 20 mil e tal.

Edifisiu foun ba Estudante Fakuldade Siensia Edukasaun ISC.

Entretantu antes hala’o lansamentu fatuk dahuluk Pe. Elisio Locateli husu ba edukador sira no fundadores Fundasaun Cristal hanesan antigus alunus Dom Bosco nian hala’o misaun Edukativa ho domin, paz, dame, respeita malu tuir prinsipiu Timoroan nian, nune’e eduka foin sai sira la’os de’it matenek maibé sai mos hanesan masin no Naroman Mundu nian, liu –liu iha Timor – Leste.

“Liuhusi Fundasaun ida ne’e, ohin hala’o lansamentu hari’i tan edifisiu foun, hanesan progresu maibé  presiza eduka foin sa’e sira tuir sistema preventivo Dom Bosco nian. Imi nu’udar sarani no hanesan estudante  presiza domin ba Eukaristia, domin ba Inan Maria, domin ba Santo Padre São João Paulo Segundu, maske tempu labarak iha Timor, altura ne’eba   iha tempu  difisil husu ba Timoroan sira, ne’ebe iha mate nia laran, hodi sai Masin no Maroman ba Mundu,” omilia Pe Locateli okaziaun misa asaun grasas hamutuk ho estudante Cristal.

Imazen ne’e, fo hanoin fali katak edisifiu ba Fakuldade Siensia Saude nian ne’ebe konstrusaun fizika finaliza ona iha ne’ebe inaugura husi Sua Eminénsia Dom. Vergilio Cardeal do Carmo da Silva, SDB.

Tenke Uza didiak Rai Mamuk no Be’e Ne’ebé Maromak Haraik hodi produz

Fatin hanesan Amu Lokateli mós espresa nia sentimentu triste tanba haree ba necesidade bázika hanesan fo’os nia presu aumenta bebeik. Parte ida nia pesoal haree no observa hodi rekonese rai mamuk barak, be’e sulin sira iha Timor –Leste, ema la aproveita hodi produs.

Tuir bibi atan  ne’e nia lian dehan, iha tempu rai di’ak, Timor – Leste, konsege fa’an fo’os ba Singapura, nune’e Iha tempu funu to’os no natar barak funsiona ho di’ak agora iha tempu ukun aan ona, loloos labele tane liman bebeik ba ema seluk.

“Nai Maromak hara’ik be’e no rai mamuk barak mai ita Timoroan sira maibé ita la uza ho di’ak. Ita lafiar malu, la valoriza malu. La’os mete vida politika maibé ita nia kondisaun balu hatudu fo’os mós karun sertu ida ne’e afeta ba mal nutrisaun. Ha’u asesu iha Jornal balu hakerek produsaun rai laran tu’un ba bebeik. Timoroan  sira tenke uza didiak be’e no rai mamuk ne’ebé Maromak haraik mai ita ho gratuita tanba fatin potensial barak abandona let hodi de’it la produs buat ida.” Pe. Locateli esplika hanesan lian motivasaun ba Estudante sira nu’udar futuru ba Nasaun Timor – Leste.

Entretantu Presidente Federasaun Nasional Antigus Alunus Salesiano Dom Bosco Timor – Leste(FNAADB- TL),  Azevedo Marcál, hato’o parabens ba Cristal, hanesan apresiasaun ida ba fundadores sira nia pasensia tanba hanesan ema saleziano konsege eduka Joven sira, nune’e bele sai hanesan Masin no Maroman Mundu nian tuir saida mak  Santu Padre hato’o ona iha Tasi tolu, Dili liuhusi nia vizita iha Timor – Leste, iha loron 12 Fulan Outubru tinan 1989.

“Ha’u só hato’o de’it parabens ba fundadores Fundasaun Cristal liu –liu Instituto Superior Cristal espera ho aumenta fasilidade kampus lori edukasaun ensinu superior sai di’ak tan tuir misaun no vizaun ne’ebe mak iha ona”. Hato’o hodi haninin ***(TTM)