Ruben “Liberdade Imprensa iha TL La’o Diak”

Dili 16/10/2012. Ruben da Conceição, hanesan jornalista ida servisu iha Media Arquidiocese Metropolitana Dili, rekonese katak, liberdade imprensa  iha Timor – Leste, la’o di’ak tanba durante ne’e, media no jornalista sira hakerek/kritika hodi  hato’o informasaun ba públiku laiha ida mak tama ba prizaun.

“Parabens ba Media sira ohin komemora loron liberdade imprensa(16/10)serta loos iha loron akontesimentu Balivo 5. Ha’u nia prespektiva ba asuntu liberdade imprensa iha Timor – Leste, haree la’o di’ak tebes. Klaru dala ruma iha impedimentu ki’ik sira, ne’e normal”, Ruben hato’o ba media ne’e, liuhusi entrevista iha Dili, bainhira husu nia prespektiva ba asuntu loron nasional ba liberdade imprensa.  

Maske nune’e, nia dehan jornalista no media sira presiza atualiza aan nafatin, no hakerek notisia, fo sai  informasaun ne’ebé mak loloos, di’ak no labele halis ba grupu ou ema politika sira nia interese balu tanba media iha pilar importante, liu –liu transmite lia husi ema lian la’ek sira.  

“Liberdade imprensa sim, maibé foka mós ba espresaun liu- liu povu ki’ik nian. Klaru suporta liberdade imprensa di’ak durante n’e tanba apoiu husi asosiasaun jornalista sira. Tanba ne’e media nia servisu (Publikasaun sira) parte ida mós influensia tebes ba dezisaun husi politika na’in sira”. Hato’o hodi hakotu.

Husi parte seluk eis jornalista Rogerio Pires, rekonese katak, liberdade imprensa ba Timor – Leste laiha problema, maibé kestaun mak uza liberdade ho di’ak hodi hato’o informasaun sira ne’ebé mak konstruktivu,  hodi hari’i sociedade ida demokratiku.

“Paraben ba media iha Timor – Leste. Tuir ha’u nia haree liberdade imprensa la’o di’ak maibé ezizi ita respeita  mós ema seluk nia privasidade. Tenke hala’o servisu ho professional hodi bazeia ba kode etika professional nian.” Hato’o husi Rogerio iha nia knar fatin, Fomento- Dili.

Entretantu Suzana Cardoso, liuhusi wa Grupu media online nian hato’o parabens ba Jornalista Timoroan sira ba selebra loron liberdade imprensa Nasional, 16 Outubru 2023, ho ezijensia hamutuk ita lori mudansa pensamentu ne’ebé kritiku no libre ba komunidade hadia’k moris prosperidade iha Timor – Leste.###(TTM)