Ricardo Neu – “Kompleta Tinan 48 Independesia  Timoroan hotu Tenke Halo Introspeksaun

Imprezariu Timoroan Ricardo C. Neu, dehan iha tinan 48 liu ba kotuk, Timoroan sira maske hasoru situasaun susar- difisil liuhusi proklamador Francisco Xavier do Amaral, hamutuk ho lider importante  sira seluk, konsege hala’o proklamasaun Independensia Unilateral ne’ebé akontese iha loron 28 fulan Novembru tinan 1975.

Publisidade Sylvia Dili

Tanba ne’e nia rekonese, ukun aan ida ne’e, la’ós prosesu fasil e agora  iha ona tinan 48, nune’e husu ba Timoroan hotu tenke halo Introspektiva.

“Ita hakruk ba lider sira nia esforsu hotu, hodi liverta Patria iha tinan 48 ba kotuk. Agora  ba ema ida – idak iha era liverdade oinsa atu kontribui ho responsabilidade ba iha prosesu dezenvolvimentu nasional iha area saida de’it. Maibé  tenke halo introspeksaun,” hato’o husi Ricardo ba Media ne’e, liuhusi entrevista badak iha nia rezidensia Pantai Kelapa Dili, loron 27 Novembru 2023.

Timoroan ne’e dehan, introspeksaun haree liuhusi atetude ema ida nian oinsa servisu ho oras, servisu ho professional, servisu ho responsabilidade tanba bainhira rekursu umanu preparadu ona,  Nasaun bele dezenvolve lalais ezemplu hanesan Singapura no Japaun, Dubai no seluk tan.

“Sim ita iha rekursu naturais maibé limitadu. Salário atu sa’e depende mos maneira servisu di’ak ou láe. Agora estratejia ida mak rekursu umanu tenke preparadu iha area hotu, maibé presiza formasaun hodi hetan skill ho professional, tuir ida – idak nia area nune’e ajuda  prosesu dezenvolvimentu bele la’o ho di’ak”. Esplika husi Ricardo hodi hakotu.

Entretantu  iha fatin ne’ebé lahanesan Rogerio Lobato, mós rekonese rekursu umanu Timoroan nian ohin loron mezmu iha matenek barak maibé seidauk bele enkaiza ho loloos – seriu iha prosesu dezenvolvimentu nasional tanba Governu rasik ladu’un fó valorizasaun ba sidadaun ne’ebé iha skill ka matenek ho esperensia.

“Ha’u kompara ho tinan 48 ba kotuk, tempu ne’eba ho 26 anos, ami ho Presidente Ramos Horta livro limitadu, matenek limitadu maibé bele ko’alia Portugés ho di’ak. Kompara ho agora internet no fasilidade iha no kompletu maibé Timoroan sira mós seidauk ko’alia Portuges ho diak. Ami uluk laiha kareta mai eskola uza kuda, husi Soibada mai eskola iha Dili maibé ko’alia Portugés di’ak liu fali mala’e sira balu,” hato’o husi Rogerio ba Jornalista sira liuhusi entrevista iha Palacio Presidente Nicolau Lobato, Aitarak Laran – Dili, hafoin partisipa iha serimonia  isar bandeira nasional hodi komemora loron proklamasaun RDTL, 28 Novembru 2023, badala 48, tersa(28/11).

Presiza fó salariu di’ak ba peritu Timoroan

Tanba ne’e, Rogerio mós husu ba Governante sira tenke fó atensaun di’ak ba Timoroan sira ne’ebé hasai kursu iha area teknika, parte saúde no area importante sira seluk duke fó salariu bot ba rekursu husi eksterior lahula tia Timoroan.

“Ita duni mak tenke valoriza Timoroan sira. Labele fó osan ituan de’it ita dehan o nia manan osan barak liu ona. Duke ita selu asesor sira, balu iha liur desempregu hela, balu mai bosok ho ijasah falsu ita selu sira triplu. Ida ne’e mak Timoroan tenke haree hamutuk”. Nia hato’o hanesan preokupasaun ida ba destinu rekursu Timoroan nian.

Intervensaun husi parte akademika

Entretantu hanoin husi Presidente Ezekutivu Fundasaun Cristal Dr. Agostinho dos Santos Gonçalves, dehan timoroan hotu iha  era ukun aan, importante tebes tenke fo liman ba malu hodi haree ba ema hotu – hotu nia di’ak, nune’e kontribui ba progresu  Nasaun Timor – Leste nian. Se iha naksalak ruma presiza resolve ho ulun malirin.

Publisidade Fundasaun Cristal

“Parabens ba povu doben Timor – Leste, ne’ebé selebra restaurasaun independensia unilateral RDTL badala 48. Timoroan hotu tenke unidade, paz no harmoznia. Se iha naksalak ruma resolve  ho ulun malirin. Importante ema hotu hamutuk haree ba interese komun nian liu –liu iha País doben Timor – Leste.” Hato’o husi Agostinho liuhusi entrevista iha nia knar fatin, Balide – Dili, Segunda(27/11/).

Observasaun Media ne’e nian iha proklamasaun 28 Novembru 2023, la’o ho di’ak partisipa mós husi xefe Estadu Guine Bissau.

Istorikamente Guiné Bissau, nu’udar Nasaun dahuluk nivel CPLP ne’ebé iha tinan 1975, rekonese Timor – Leste hanesan Nasaun Independente ida, livre no anti kolonialista iha nivel Sudeste Asiatiku.

Enkuantu parte importante ida animasaun nian partisipa mós husi grupu dansa bidu tradisional husi postu administrativu Maubisse, Munisipíu Ainaro. ****(TTM)