Meta – Fera “Uluk Hakilar ba Ukun Aan – Agora Tenki Kontribui ba Dezenvolvimentu”

24/08/2026. Sidadaun ida ho Naran Kompletu Alberto Carlos, Kodigu Meta – Fera, esplika katak, uluk tempu rezistensia nian luta ba prosesu livertasaun nasional, nasionalista sira hakilar katak, mate ka moris ukun rasik aan tanba ne’e,  tempu ona ba sidadaun hotu, tenki koopera no kontribui di’ak liutan ba iha prosesu dezenvolvimentu ne’e rasik.

“Uluk ita mak hakilar katak, mate ka moris ukun rasik aan. Era liverdade ona, Governu – Estadu hakarak halo dezenvolvimentu iha fatin ruma, atu iha rai Estadu ka rai Privadu sidadaun se – se de’it tenki koopera hodi Nasaun ne’e bele sai furak”.  Kestaun ne’e, hato’o husi Meta – Fera, ba Media ne’e, iha Baide – Dili, liuhusi entrevista liga asuntu politika Governu nian ne’ebé  halo eviksaun ba alargamentu Estrada no hasai komunidade ne’ebé okupa iha espasu públiku no Propriedade Estadu nian.

Meta – Fera esplika katak, ema Timoroan ho Timoroan, bainhira konsege  ko’alia ba malu ho diak, fasil tebes rona malu no laiha problema – violensia.

“Ita Timor ne’e, bainhira ko’alia didiak ba malu, ha’u sente bele simu malu , koopera malu mós  fasil tebes. Maibé se ita mai uza lian kroat, obriga de’it, ne’e susar tebes tanba ha’u haree hanesan foin lalais, iha fatin balu autoridade no komunidade balu, baku fali malu,  ikus mai viral iha media social,” rekoñese husi Meta Fera, hanesan preokupasaun ida.

Maske nune’e, Meta- Fera iha esperansa ida katak, sidadaun hotu sei kopera ho  Governu, liga ba Politika alargamentu Estrada iha Dili laran no munisipíu sira, nune’e, dalan no espasu públiku sira, bele sai kapas no furak tuir politika Governu nian.

“Sidadaun hotu tenki hanoin katak, kapital Nasaun – inklui kapital Munisipíu sira labele kontinua sai nafatin hanesan fahi luhan. Ita hotu tenki koopera maibé husu ba Governu mós tenki kria kondisaun ba maluk sira ne’ebé, afeta ba eviksaun iha Timor – Leste”. Hato’o husi Alberto”Meta – Fera”, hodi haninin.

Fo hanoin fali katak, parte kompetente sira(Governu) durante ne’e, halo eviksaun iha rai Estadu, Privadu hodi sobu uma ba alaramentu estrada no halo baleta afetadu sira sempre hetan osan husi Governu hanesan rekompensasaun(Ganti Rugi).