Vice Prezidente eleitu Asosiasaun Nasional Produtor Fini Komersial Timor – Leste (Anaprofiko TL), ba periodu 2023 – 2028, Samuel Soares, dehan daudaun ne’e, Governu kontinua sosa fo’os husi rai liur, tanba produsaun ai – han iha rai laran, liu –liu fo’os kontinua menus.
Tanba ne’e, nia espika katak, bainhira sidadaun agrikultor, inklui grupu asosiasaun agrikultores nasional sira iha teritoria tomak, iha vontade no servisu ho badinas, hamoris fali to’os no natar abandonado sira, inklui apoiu husi parte hotu, liu –liu Governu iha futuru mai, Timor – Leste, sei hamenus dependensi ai- han ba rai seluk.
“Klaru katak atu hamenus dependensia ai – han ba Nasaun seluk, ha’u fiar katak, laós agora kedas ita hapara. Atu minimiza ka hapara dependensia ai – han grupu agrikutor sira hotu, tenke iha seriedade hodi hasa’e produsaun iha rai laran. Maibé presiza intervensaun Governu nian hodi fó apoiu direta no indereta,” Samuel hato’o kestaun ne’e ba Time Timor liuhusi entrevista iha nia knar fatin Faulara, Dom – Aleixo, Dili, segunda(24/04).
Samuel esplika ho klean, hodi rekoñese katak, durante ne’e, tuir nia observasaun grupu asosiasaun agrikultor sira iha duni vontade servisu hodi hasa’e produsaun sira maibé seidauk hetan atensaun didiak espesialmente husi Governu.
“Ita nia Grupu agrikultor sira iha rai laran, tuir ami nia observasaun sira iha vontade servisu maibé ita labele kompete tanba primeiru ita sei uza sistema agrikultura tradisional. Problema Segundu falta finanseira no falta ai – moruk/adubu ba kuidadu ai- han sira ne’ebe kuda iha to’os no natar”. Nia hato’o hodi hakotu.
Iha fatin hanesan Presidente Anaprofiko – TL, Ilidio M. Mauterça, fó nia hanoin katak, ba Futuru setor Agrikultura mak sei subtitui fali setor petroleum tanba mina sei maran, maibé setor agrikultura sei la maran hanesan mina.
“Durante ne’e, ita nia reseita sei depende hela ba reseita mina rai nian. Maibé bainhira ita dezenvolve didiak fali setor agrikultura, mal nutrisaun sei lakon, saude sei di’ak, kuandu barak ona bele lori ba merkadu regional no internasional, ida ne’e sei lahotu” hato’o husi Ilidio.
Tanba ne’e, hanesan sidadaun’ husu mos ba Governu ne’ebé mai, presiza tau atensaun di’ak ba setor agrikultura tanba sei fó vantajen bot ba povu no Nasaun, liu –liu povu ki’ik ho rendimentu nato’on.
“Ba Governu ne’ebé mai tenke hanoin ona katak, durante tinan 20 ne’e, setor agrikultra dezenvolve to’o ona iha ne’ebé. Ita tenke iha vizaun diak ba setor agrikultura ne’e rasik. Se karik iha mudansa klimatika saida mak presiza halo tanba setor agrikultura nu’udar fuan ba Nasaun”. Rekonese hodi hakotu.
Husi parte seluk media ne’e hakarak relata katak, dadus internasional balu dehan, tama ba tinan 2030, bainhira produsaun rai laran laiha mudansa mak Timor – Leste, sei depende ai – han ba Nasaun seluk entre 80 to’o 90%, tanba kauza ida to’os no natar potensial sira kontinua abandonadu no menus tebes investimentu ba setor agrikultura iha País ida ne’e.***(TTM)
Discussion about this post