Tinan 2022 DIT Estabelese Kursu – Rua iha Area Doutoramentu

Reitor Dili Institute Of Technology (DIT), Alvaro Menezes, SE, M. Si, Ph.D dehan, tinan 2022 mai, DIT sei estabelese tan Kursu Doutoramentu iha area Jestaun no Kontabilidade.

Tanba ne’e, Reitor DIT dehan, iha tinan 2021, preparasaun ida mak komesa hari’i ona  edifisiu andar foun, inklui prepara fasilidade kampus no  mós iha tinan ne’e, DIT iha ona kandidatu doutoramentu ema nain tolu.

Reitor ko’alia katak, rekursu sira kontinua prepara, hodi bele apoiu kursu sira ne’ebé sei estabelese iha tinan 2022.

“Ba Kursu Mestradu(MBA), ita estabelese ona iha tinan rua liuba(2019). Ba tinan ida mai ne’e, DIT sei estabelese tan  kursu nivel doutoramentu  ninian ba kursu rua Jestaun no Kontabilidade”, kestaun ne’e, Reitor hato’o liuhosi nia diskursu iha okaziaun Graduasaun DIT ba dala XIV, iha ne’ebé tinan akademiku 2021, DIT gradua tan finalista kuaze 354.

Ho ida ne’e, Reitor  DIT hato’o  tan katak, papel Ensinu Superior mak kontinua dezenvolve area rekursu umanu ho objetivu ba kresimentu ekonomia, tuir kondisaun ne’ebé  sustentabilidade iha Timor – Leste.

“DIT oras ne’e, kontinua haforsa area peskiza, hodi kontribui ba area Governasaun diak. DIT mós produs artigu sientifiku hodi halo publikasaun iha jornal Internasional. Ba  tinan 2021, DIT públika ona artigu 10”, hato’o husi Reitor.

Enkuantu Reitor Alvaro Menezes, lori DIT nia naran, iha graduasaun ne’ebé hala’o iha loron 29 Novembru 2021, hato’o agradese ba Ministéiru Ensinu Superior Siensia no Kultura, ANAAA, Klibur Instituisaun Privadu Ensinu Superior sira iha Timor – Leste(KIEPSTL), no parseiru rai liur sira hotu, tanba tulun ona DIT,  bele la’o ho di’ak to’o ohin loron.

Sujestaun ida ba Governu Reitor husu  katak, presiza hasa’e montante osamentu ba Setor edukasaun tanba  hahú 2019, 2020, 2021, 2022, osamentu ba setor edukasaun liu husi OJE nia porsentu tun ba bebeik.

“Atu dezenvolve setor edukasaun mak Governu kada OJE tenke koloka 20 to’o 26 porsentu, ba area edukasaun, só nune’e mak bele hadi’a kualidade Rekursu umanu iha Timor – Leste”. Reitor  hato’o hodi hakotu.***(Time Timor)