Reprezentante komunidade Bebonuk J. K Colo, dehan Kompania Hidayat la abandona projetu rehabilitasaun Estrada no drainazen iha suku Bebonuk, aldeia Metin I, postu administrativu Dom Aleixo, Munisípiu Dili. Lia hirak ne’e hato’o hodi responde ba ema dehan, tanba sa obra drainazen Bebonuk kuaze tinan ualu ona, labele finaliza.
Sidadaun ne’e aumenta tan katak, obra husi projetu ne’e, implementa kedas iha tinan 2013, no tempu ne’ebá besik finaliza ona maibé kompania halo konsulta ho komunidade balu besik estrada ibun, tanba kooperasaun ho komunidade ladun di’ak, hodi entrega espasu rai balu, nune’e, kompania labele finaliza lalais drainazen ne’ebé iha, nune’e, tempu udan be’e sulin hotu ba estrada laran.
“La’os kompania Hidayat mak lakohi finaliza lalais obra ida ne’e. Projetu ne’e dura ona ba tinan ualu, tanba komesa iha tinan 2013. Problema mak ne’e, ema balu lakohi koopera ho kompania hodi oferese uma oin, hodi bele ke’e be dalan ikus mai labele fasilita bé la’o ho normal. Mezmu nune’e, ema balu koopera hodi fasilita kompania tanba haree ba dezenvolvimentu.’’ Dehan Colo ba Time Timor iha aldeia Metin I – Bebonuk, tersa(09/02).
Ligasaun ho projetu ne’e, komunidade no autoridade lokal sira iha Bebonuk, ko’alia bebeik ona ba públiku, liuhosi jornal sira, hodi husu ba kompania Hidayat toma responsabilidade, maibé to’o ohin loron laiha resposta ruma, ne’ebé signifikativa.
Mezmu nune’e, teknika husi kompania nian mós, dala wain tun ba hasoru malu ho autoridade no komunidade balu, hodi buka solusaun ba problema ne’ebé mak iha, ligasaun ho drainazen refere. Observasaun Time Timor nian iha kapela Bebonuk nian oin, kondisaun hatudu katak, bainhira tempu udan, alende bé nakonu iha estrada laran, difikulta mós movimentu transporte públiku no privadu sira. ***(Time)
Discussion about this post