Problema Finanseira: Loja Nain Balu Dada Aan Husi Sentru Komersial TP

Aluger feto ida ne’ebé durante ne’e, estabelese loja ki’ik ida iha sentru komersial Timor Plaza (TP)suku Bebonuk, dada aan ona, hodi fa’an fali sasan iha fatin seluk tanba rendimentu no gastu la valansu. 
Nia rekoñese tan katak, osan ne’ebé nia hetan ne’e, kada fulan selu hotu kedas ba Nain Timor Plaza. Tanba ne’e, hili alternativu seluk hodi estabelese no aluga fali uma privada ida iha Bidau – Dili, hodi kontinua halo bisnis(atividade venda).
“Sim osan tama no sai la valansu. Seidauk konta ho seluk funsionáriu sira. Covid mai lori impkatu bot. agora sasan folin sa’e maka’as, impkatu bot tebes, nune’e, empresa hasoru problema finanseira. Maske nune’e, ami kontinua buka solusaun ho dalan saida de’it,” Nia informa ba Time Timor iha TP, tersa (24/01). 
Hanesan investor ida husi husi rai liur, rekonese katak, durante hala’o atividade venda iha Timor Plaza, antes seidauk mosu Covid – 19, atividade hotu la’o ho normal. Maibé hafoin invazaun Covid, liu –liu iha Timor – Leste, hasoru problema lubuk ida hahú kedas husi Portu iha problema ne’ebé komplikadu relasiona ho birokrasia ninian. 
Tanba ne’e, nia rekomenda ba Governu, se bele habadak birokrasia iha sasan tama. Alende ne’e, husu atu regulariza m’os, emprezariu Chines sira ne’ebé, mai Timor – Leste, tanba sira rasik mak halo loja sira iha Dili laran.
“Loloos Governu mak prepara fatin hanesan mal, sentru komersial sira. Bainhira simu proposta husi emprezaria rai liur indika kedas fatin ba sira hodi seluk taxa, Maibé loza barak husi empreza liur, sira mak halo uma rasik, depois ikus mai regula sasan folin tuir ida – idak nia gostu.” Nia hato’o hodi hakotu.
Ligasaun ho uma komersial no mal iha Dili, empreza balu mak estabelese ona iha suku Mahodi - Tera Santa, hodi muda vendedor sira husi Kampung – Alor ne’ebé maioria nu’udar sidadaun Indonesia, ikus mai kada fulan selu ba empreza, depois aplika taza ba Governu.*** (TTM)