Dom Bosco Mestre – Aman ba Foin Sa’e (Joventude)

Amu Kapelaun Instituisaun Edukativa Cristal Manuel Pinto SDB, dehan Dom Bosco, nu’udar mestre no aman ba foin sira tanba iha sekulu 19, maske hasoru dezafiu oin –oin iha rai Italia, konsege hari’i kongresaun Salesiano hodi akumula joven sira wain ba wain hodi hetan edukasaun, formasaun ba hadi’a vida moris, no konsege lori joventude (Feto/mane) hakbesik aan ba Maromak, liuhusi atividade oratório. Dom Bosco sai ona fermentu ba joven iha Mundu inklui iha Timor – Leste

Lian hirak ne’e, hato’o husi amu Kapelaun Cristal iha okaziaun selebra misa ba loron Dom Bosco, iha loron 31 fulan Janeiru 2023, ne’ebe realiza iha Salaun Cristal – Balide Dili, hamutuk ho estudante/Fundador Fundasaun Cristal tanba Santu ne’e, nu’udar padrueira ba Instituisaun Edukativa Cristal.

Parte ida haree ba obra Dom Dom Bosco ne’ebé hari’i ona atividade Oratóriu, kapelaun Cristal ne’e, husu ba edukador sira iha eskola Cristal, atu kontinua implementa program oratorio iha eskola, nune’e,  kontinua hanorin joventude Timoroan sira hatene hadomi malu, perdua malu, hodi sai mos sarani no sidadaun ne’eb’e di’ak ba Nasaun.

“Oratóriu hanesan obra ida husi Dom Bosco nian. Nune’e, lori joventude ba dalan Santidade. Formasaun iha oratório forma ema sai sidadaun no sarani ne’ebé di’ak”. Lian amu kapelaun Cristal.

Fatin hanesan Jacinto Oliveira Junior, nu’udar mós antigus Alunus Salesiano Dom Bosco, atúal edukador ida iha Instituisaun Edukativa Cristal husu ba Estudante sira iha Cristal no eskola sira seluk iha Timor – Leste, tenke buka hodi moris tuir prinsipiu ne’ebé Dom Bosco husik hela ona dezde nia sei moris “Razaun, Reliziaun no Amor”. Alende ne’e, nia husu ema ida – idak, hanesan estudante Timoroan tenke sai fermentu moris iha familia no sociedade nia let.

Enkuantu Reitor Instituto Superior Cristal Dr. Sebastião Pereira, refleta ba loron Dom Bosco, husu ba edukador sira hotu, atu hanorin estudante sira ho Domin, hanesan Dom Boco servi’i foin sa’e sira no Igreja ne’ebé laiha kolen.

“Dom Bosco hadomi foin sa’e sira, nune’e, hari’i kongresaun Salesiano,  akumula hodi eduka fó formasaun . Tanba ne’e, Instituisaun Edukativa Cristal tenke banati hahalok ida ne’e, tanba Eskola Cristal nia fundador sira mai husi Antigus Alunus Salesiano Dom Bosco”. Lian Reitor liuhusi nia palestra hafoin misa espesial ba Dom Boco iha Salaun Cristal.

Parte Importante ida ligasaun ho festa Dom Bosco, Presidente Ezekutivu Fundasaun Cristal Agostinho dos Santos Gonçalves, liuhosi nia palestra badak fó parabens ba antigus alunus Salesiano sira hotu tanba obra Dom Bosco nian, nu’udar fini di’ak kobre ona iha Timor laran tomak sai buras ba bebeik, kontribui ba Nasaun no Igreja Timor – Leste.**(TTM)