Loron Ikus Halot Prelados Nain Hat: Komisaun organizadora Husu Sarani Limita Movimentu

Dili, 09/09/2026. Komisaun  organizadora ba halot restus mortais Amu Bispu nain hat iha diocese – Dili,  kompostu husi, Governu, parte Igreja rasik, Siguransa(PNTL) –  Defesa (F – FDTL), husu ba sarani sira, liu -liu bainhira partisipa iha misa ikus iha Espalada Tasi -tolu, iha tuku lima loraik (10/09/2026),  presiza koopera iha parte movimentu nian(Labele la’o ba mai iha dalan protokolu ne’ebé determinadu), nune’e hodi fó  liu oportunidade ba alta entidade sira, ne’ebé akompana direta ba iha prosesu tomak transladasaun nian husi diresaun dalan Tasi – tolu, ba Igreja  Katedral Imaculada da Conceição,  Vila – Verde, Dili.  

“Husu  sarani hotu depois termina misa iha tasi tolu, mantein iha ida – idak nia fatin hodi akompaña fali  transmisaun ne’ebé mak sei fó sai iha  tala Televisaun(ne’ebé monta ona iha area Esplada Tasi tolu nian). Limita movimentu sira  hodi garante siguransa no espasu di’ak ba transladasaun hodi halot urna – restus mortais bispu nain hat iha katedral Dili,” asuntu ne’e fo sai husi komisaun Organizadora, liuhusi Komunikadu imprensa ne’ebé realiza iha Dili, Tersa – dader(08/09).  

Parte Siguransa mós husu ba sidadaun ne’ebé kondus motorizada no kareta sira, presiza nafatin respeita ba regras no sinais tranzitu ninian ne’ebé iha, hodi labele kria Engarafamentu, liu -liu iha dalan públiku.

Orariu Taka dalan iha loron 10 fulan  Setembru 2026

Antes misa iha Esplanada Tasi – tolu, Dili, dalan bot diresaun ba Tasi – tolu, hahú taka ona iha tuku 03. 00, otl. Depois misa sai dalan diresaun Ai – tarak laran, Vila – Verde, sei taka iha tuku lima loraik, to’o finalizasaun halot restus Mortais nian ramata.

Tuir ajenda antes ba halot Preladus sira sei iha mos diskursu husi Prezidente da Republika inklui lian agradesimentu sira husi parte relevante sira seluk. Alende ne’e, informasaun ida mai husi komisaun organizadora katak, iha espasu Igreja  Katedral Imaculada da Conceição,  Vila – Verde, Dili, media nasional rua mak bele foti filmazen kompostu husi RTTL, no GMN TV, ho rekomendasaun Media seluk bele foti informasaun hodi hato’o ba publiku bele liuhusi husi link(RTTL no GMN TV nian).