30/09/2026. Parte relevante sira hanesan Inspesaun Geral Estadu, PDHJ, no sira seluk iha Nasaun ne’e dehan, durante ne’e, tu’un ba base identifika katak, projetu lubuk ida liu – liu estrada la finaliza signifika katak, kompania sira abandona no la konklui obra ne’ebé iha, tuir tempu determinadu nune’e sai preokupasaun ida ba populasaun sira iha base.
Foto FB Kondisaun Estrada iha Lolotoe, La’os Projetu abandonado
Haree ba hahalok ne’e, sidadaun balu konsidera katak, iha aktu utiliza osan Estadu nian la tuir dalan, maibé autor lubuk ida diskonfia lei la kondena sira nia asaun, nune’e kontinua la’o libre maske ba presta ona deklarasaun sira iha parte kompetente lubuk ida.
“Ami nia parte so ba haree osan sira ne’e, gasta los ka la’e. Hetan kondenasaun ou la’e, parte seluk nia servisu. Identifika mós sidadaun balu liuhusi kompania sira, utiliza sala osan Povu nian tanba Projetu balu hala’o desde 2011, laiha finalizasaun. Kazu balu iha Maliana no fatin sira seluk abandonadu. Husi hahalok sira ne’e, rekomenda ba parte relevante nune’e kazu ida rua sai tia ba arkivu no autor sira kontinua la’o libre maske fó prejuizu bot ba Estadu.” esplika husi fonte ida ho inisial M. A, ba media ne’e liuhusi dada lia badak iha Dili, Tersa(29/09).
Nia parte rekonese tan katak, kazu balu hanesan mal jestaun ba osan povu nian, la la’o ba oin tanba kontinua iha intervensaun balu diskonfia relasiona ho poder politika no poder ekonomiku seluk tan.
“Iha fatór lubuk ida mak sai impedimentu ba kazu sira ne’ebé fo prejuizu ba Estadu. Bele iha evidensia forte maibé mosu intervensaun ba servisu Instituisaun balu nian, klaru ida ne’e labele la’o ba oin”. Lamenta husi sidadaun balu hanesan preokupasaun.
Maske nune’e, rekomenda ba parte hotu, liu -liu ba parte Justisa tenki hala’o servisu ho imparsial, independente nune’e la bele lakon kredibilidade.
“Di’ak liu instituisaun ida – idak, hala’o nia servisu sein intervensaun husi parte seluk, tantu poder politika, ekonomiku ka seluk tan hodi nune’e, bele hadi’a servisu justisa iha País ne’e, ne’ebe oras ne’e, kontinua sai preokupasaun bot ida”. Hato’o hodi hakotu.
Maske nune’e, parte Justisa rasik liuhusi pesoal balu dehan, kazu balu sensibel tebes nune’e, labele hetan kondenasaun hanesan ema barak nia hakarak tanba buat hotu tuir prosesu signifika kazu balu iha hela investigasaun maske autor sira kontinua la’o livre, nune’e loron ruma, autor prinsipal sei ba kumpri pena ou multa tuir lei haruka.
Discussion about this post