Ligasaun ho Serka Sanitária(SS)no Konfinamentu Obrigatóriu espesialmente iha Kapital Dili, hodi funu hasoru Covid – 19, parte negativu ida, difulta tebes prosesu aprendizajen, tanba estudante sira labele tuir aula ho normal.
Media ne’e asesa informasaun iha terenu, situasaun hatudu eskola privada balu la’o normal, tanba sira nia Instituisaun no edukador sira, iha inisiativa forte, hodi suporta estudante sira, maske hela iha uma, maibé nafatin tuir prosesu aprendizajen hanesan baibain, liuhosi uza via online.
Situasaun seluk, eskola publika sira, durante Serka Sanitária no Konfinamentu obrigatóriu, hasoru difikuldade tanba eskola rasik no edukador sira, laiha kbi’it sufisiente, hodi fasilita estudante sira, tuir prosesu apredizajen via online.
Ligasaun ho asuntu ne’e, profesora ida, nivel eskola Sekundária, husi eskola Raina da Paz – Dili, lakohi temi nia identidade dehan, durante periodu Serka Sanitária no Konfinamentu obrigatóriu, estudante sira lakonsege tuir aula via online, tanba laiha kondisaun di’ak no adekuadu ba sira.
“Ami nia eskola durante ne’e, bele dehan prosesu apredizajen la la’o di’ak. Edukador sira koko ona, no hakarak fasilita estudante sira, tuir lisaun uza meius online, maibé problema ida mak estudante barak laiha telefone,” dehan profesora ne’e, bainhira hasoru malu ho Jornalista Time, iha eskola Raina da Paz, kinta (05/05), semana ne’e.
Nia rekoñese tan, hanesan profesora Biologia, tenta ona, hodi fasilita estudante sira tuir aula online, maibé problema mak meius.
“La’os eskola no edukador sira mak lakohi fasilita estudante sira tuir aula via online, maibe, maioria estudante sira laiha telefone di’ak. Balu tenke empesta fali bin, maun, ka inan – aman, nia telefone iha uma. Ida ne’e, susar ba sira, hodi tuir prosesu apredizajen.” profesora ne’e esplika hodi hakotu.
Maske nune’e, eskola públika sira hanesan Cristal, Sao Pedro, inklui sira seluk iha kapital Dili, iha fulan Abril 2021, prinsipalmente estudante husi nivel sekundario, hahú husi primeiru anu no terseiru anu, konsege hala’o ezame ba etapa dahuluk. Kondisaun seluk iha eskola sira ne’e, ba daudaun ne’e, estudante sira kontinua nafatin hala’o aula hanesan baibain, liuhosi via online, mezmu hela de’it iha uma.”””” (Time)
Discussion about this post