Ko’alia konaba ai – funan, lori ita nia hanoin hodi imajina kedas kor ai – funan sira ne’ebé, ita haree iha jardin. Ai- funan iha kor mean, mutin, kor rosas inklui seluk tan, atrai tebes ema nia matan, tanba ai – funan iha forsa velesa natural, ne’ebé emosionante.
Luis M. Branco alias “Ema Di’ak”, dehan kuda ai – funan dala ruma ita lahatene nia funsaun ne’ebé loloos, maibé ida ne’e hanesan atividade arte.
Bazeia ba livru Oxford hateten, arte nu’udar ekspresaun no implementasaun kreatividade, imajinativa humana, iha forma visual.
“Kuandu ita ba vizita hodi haree, ai – funan sira iha Jardin laran, ho kor oin – oin, iha ne’eba situasaun hatudu ambiente matak, furak, fresku tebes, nune’e espontaniamente halo ita laran ksolok, kontente, tanba sente kmanek liuhosi nia furak no veleza sira ne’ebe freska,” hato’o husi Luis Branco, bainhira hasoru malu Jornalista Time, iha nia residensia, aldeia 03, Fatuhada kinta (14/05).
Hanesan ema ida ne’ebé kuda ona ai – funan, hahú husi tinan 2002 to’o ohin loron, husi Branco husu hodi dehan, se de’it mak hakarak kuda ai – funan, iha jardin ki’ik, ou uma oin, labele kuda kor ida mesak ka modelu uniku.
“Kuda ai – funan iha uma oin, presiza modelu barak. Tanba ho kor ai – funan nian ne’ebé kapa’as (Berwarna – warni), alende atrai ema nia matan, halo uma oin iha ambiente ida ne’ebé, sai furak no freska tebes, tanba iha ambiente no ar ne’ebé konfortabel,” Luis esplika.
Ai – Funan iha valor ba atvidade Ekonomia no Relizioja
Media ne’e, asesa informasaun balu iha Luis M. Branco nia uma, realidade hatudu, tanba ho nia bada’en no badinas tebes, konsege kuda ai – funan tipu variedade sira mak hanesan:
- Ai – funan rosas
- Ai – funan Santu (Bunga Kamboja)
- Trapadeiras, inventa husi Luis Branco, hun ida iha kor lima, no balu hat, tau kedas iha balde non bazu atrai tebes ita bainhira haree besik.
- Ai – funan orquidea(Angrek)
- Ai – funan cestas (Bunga kestas)
- Inklui sira seluk tan.
Husi Ai – funan sira ne’e, tanba ho nia kor sira mesak furak, no bonita, atrai ona ema wa’in nia matan, ikus mai balu ba sosan iha uma, ka residensia Luis Branco nian ne’ebé lokaliza iha aldeia 03, suku Fatuhada.
Parte seluk, hanesan ema fiar na’in, Luis Branco rekoñese, kuda ai – funan iha uma oin, bele utiliza ba atividade relizioja no kultura.
“Tenke hatene katak, importansia kuda husi ai – funan, bainhira iha misa matebian, ou finadu, lori ba igreja hetan bensaun, ikus mai tau rate hodi hatudu, ita nia domin, ba maluk sira ne’ebé, mate ona. Ida ne’e valor positivu tebes, husi rezultadu kreatividade kuda ai – funan.” Pesoalmente rekoñese ida ne’e.
Ikus liu hanesan aman ida, ba oan na’in hat, Feto rua, mane – rua, ho espresaun hamnasa iha oin dehan – “Ha’u iha Grupu naran “San Siro Florisd” no iha ona moto ida katak, Ba Familia atu sosa ai – funan, fa’an folin karun, ba kolega foli karun, maibé ladun todan,bele mós oferese gratuita hanesan presente, kuandu hakarak. Maibé ba ema seluk, ne’ebé lakoñese di’ak, baratu tebes.” Nia dehan hodi hakotu.
Fó hanoin mós katak, ba leitor sira ne’ebé hakarak sosa ai – funan, bele kontaktu ba númeru, ne’ebé iha kraik ne’e, 77111188.***(Time)
Discussion about this post