Agapito da Silva, nu’udar dosente ida no hala’o mós, servisu nu’udar Xefe logistica iha Instituisaun Edukativa Cristal/Fundasaun Cristal, iha loron 6 fulan Janeiru 2023 hetan sertifikadu apresiasaun husi Fundasaun Cristal(FC),tanba durante tinan 2022, hanesan xefe logistica, hatudu ona servisu ida excellente, bazeia ba despaixu husi reitor ISC Dr. Sebastião Pereira, no Presidente Ezekutivu Fundasaun Cristal Dr. Agostinho dos Santos Gonçalves.
Bainhira hasoru malu ho Jornalista Time Timor iha Cristal – Balide, tersa(31/01)semana ne’e, nia pesoal dehan “Ha’u la espera bele hetan apresiasaun husi Fundasaun Cristal, maibé nu’udar funsionáriu, hala’o de’it ha’u nia servisu tuir hirarkia ne’ebé mak iha”.
Tuir xefe Logistika ne’e nia esplikasaun ida katak, atu hetan apresiasaun ba servisu saida de’it, mezmu servisu iha instituisaun públika no privada tenke hatudu disiplina.
“Iha Cristal ami lubuk ida mak hetan apresiasaun tuir ida – idak nia area servisu. Maibé atu hetan apresiasaun ha’u sempre dehan ba kolega sira katak, disiplina mak sai fator determinante,” Agapito esplika.
Enkuantu hanesan funsináriu ida iha Fundasaun nian konsege hato’o lia korazen ba funsionáriu sira seluk katak, kada tinan fundador sira no reitor, sempre halo avaliasaun ba funsionáriu sira tanba ne’e, bainhira disiplina iha servisu, avaliasaun ikus mak sei determina hodi bele sai melhor dosente, funsionáriu no edukador.
Ikus liu Agapito da Silva, hato’o mensajem geral ba ema hotu katak, konfiansa saida de’it mak ita simu tenke ezekuta ho di’ak. Tanba ne’e, estudante ka knar hanesan dosente responsabilidade importante tebes, inklui mós tenke uza knar ho di’ak bazeia ba orientasaun.
Relasaun ho prestasaun servisu di’ak, matenek na’in balu dehan, atu servisu la’o di’ak iha ofisiu ka instituisaun públiku e privadu, funsionáriu sira tenke hetan sinal apresiasaun, tuir servisu ne’ebé sira hatudu. Psikolojikamente sinal apresiasaun motiva makina estadu ou privadu(funsionáriu), bele servisu ho responsabilidade.***(TTM)
Discussion about this post