Komandante Jeral Polisia Nasional Timor – Leste(PNTL), Henrique da Costa, husu ba membru PNTL tomak iha Timor – Leste, presiza halakon arogansia nune’e bele servi’I povu, servi’I instituisaun no Nasaun doben Timor – Leste.
Henrique hateten, PNTL aprende husi nia esperensia pasadu sira, nune’e ohin loron tama ona ba idade joven, tanba ne’e ezizi servisu ida ne’ebé presiza hatudu duni professionalismu, imparsialidade, tuir vizaun estratezika hodi garante paz no estabilidade iha Timor – Leste.
“Atu servi’i povu, Ita nia instituisaun PNTL, inklui Nasaun Doben Timor – Leste, presiza halakon arogansia sira. Mai ita servisu hamutuk konta ho apoiu sira seluk, hodi garante paz no estabilidade iha nivel nasional, regional no global ninian,” diskursu KomJer – Henrique da Costa, iha Bairo – Pite, Dili, segunda(27/03), bainhira assume knar foun hanesan komandante Jeral PNTL ba periodu tinan(3) 2023 – 2026.
Tanba ne’e, parte importante ida Komjer husu ba membru ativu tomak, kontinua aplika koñesimentu no matenek ne’ebé hetan ona durante ne’e, hodi konkista objetivu sira prinsipalmente garante paz no servi’i komunidade tuir papel no lei organika PNTL nian.
Fatin hanesan Presidente da Repúblika José M. Ramos Horta, ne’ebé sai sasin ba tomada pose ne’e, hato’o parabens ba Komandante jeral PNTL Henrique da Costa, no nia vice foun Pedro Belo, hato’o mós ezijensia ida, hala’o servisu ho imparsialidade, neutron, liuliu ba hasoru eleisaun lejislativas 2023, ne’ebé nu’udar festa demokrasia ba povu iha tinan ida ne’e.
“Parabens ba komandante nain rua. Lahaluha agradese mós ba didikasaun no servisu ne’ebé hala’o husi komandante jeral sesante. Hasoru eleisaun agora, ezijensia ba komando PNTL servisu tenke imparsial no neutron hodi garante paz no estabilidade.” Lian PR Horta, hafoin asiste serimónia aniversáriu PNTL nian badala 23, ne’ebé tinan ida ne’e, hala’o iha Bairo – Pite, Dili, ho tema “Ho Disiplina ita Hametin PNTL, sai Instituisaun Konfiante no Modernizada”
Observasaun media nian, iha aniversáriu PNTL ba tinan ne’e, hala’o mós aprezentasaun Drum Band husi eskola São Brito Liquiça. Alende ne’e, hetan prezensa husi Kepala Kepolisia Daerah Nusa Tenggara Timur(NTT), Irjen Pol Drs. Johni Asadoma, M. Hum no komitiva, hamutuk ho korpu diplomátika, veteranu no entidade relevante sira husi rai laran no rai liur.***(TTM)
Discussion about this post