Jogu final iha eventu kompetisaun Futsal Intra eskolar tinan 2022, ne’ebé realiza iha eskola Cristal, Eskola Sekundaria Sta. Madela de Canossa sai kampiaun, liuhosi hetan golu 5, kompara ho equipa husi Cristal hetan golu 4, iha jogu entre equipa rua, faze final nian ne’ebe hala’o iha Kampu Futsal Cristal Balide – Dili, sesta(03/06).
Presidente eventual, nu’udar mós diretor eskola Sekundaria Cristal, Rafael Savio, hato’o parabens ba eskola Canossa, tanba sai kampiaun, no apresia mós ba equipa hotu husi kada eskola sira, liu –liu equipa rua, Cristal no Canosa, ne’ebé konsege hatudu disiplina iha jogu, durante fase final nian.
“Parabens ba Canossa tanba sai manan na’in iha jogu ida ne’e. Parabens ba equipa rua, inklui equipa hotu husi eskola ne’ebé partisipa ona iha eventu. Ha’u kontente tanba hahú inisiu kuandu jogu hala’o iha loron 24 fulan Maiu, no ensera iha loron 3 fulan Juñu, la rezulta problema ruma, ida ne’e sinal ida katak, iha amizade, paz, entre estudante sira hanesan futuru ba Nasaun ida ne’e nian”. Hato’o husi prezidente eventual.
Fatin hanesan Xefe Suku Mascarinhas, Rui Ilidio de Araújo, inklui Presidente Ezekutivu Fundasaun Cristal, Agostinho dos Santos Gonçalves, liuhusi sira nia deskursu badak, hato’o katak, atividade desportiva ne’e, presiza kontinua, no hakarak iha tinan oin mai, bele envolve tan eskola no equipa sira seluk ne’ebe seidauk iha hodi partisipa iha kompetisaun intra eskolar.
“Tinan oin mai, ita sei aumenta tan equipa husi kada eskola sira, nune’e, bele mós partisipa iha eventu amizade ne’e, hodi kria domin, haksolok, dame, paz, entre eskola sira, liu –liu estudante sira”. hato’o husi Presidente Ezekutivu FC.
Ligasaun ho atividade desportu ne’e, hetan Finansiamentu husi Parte Fundasaun Cristal(FC) no mós Instituto Superior Cristal (ISC), hodi komemora aniversariu 20 anos restaurasaun RDTL, no komemora loron padrueira eskola nian, Maria Auxiliadora(24/05), Festeiza mos Ezestensia Fundasaun Cristal No Instituisaun Edukativa Cristal ba dala 38, ne’ebé sei monu iha loron 5 fulan Juñu 2022.
Entretantu tuir informasaun ne’ebe Time Timor asesu terseira lugar,kontinua okupa , husi eskola sekundaria Cristal, grupu B, ba kuarta lugar okupa husi eskola Novel da Paz. Equipa sira hotu ne’ebe tama klasifiksaun 1 to’o 4, hetan kedas premiu husi komisaun organizadora , hafoin Presidente Ezekutivu Fundasaun Cristal, Agostinho dos Santos Gonçalves, hala’o enseramentu ba eventu refere. ***(TTM),
Discussion about this post